FLASH
Shkruar nga Pamfleti
SHBA ka ndaluar ndihmën financiare për Gjeorgjinë. Ishte sekretari amerikan i Shtetit, Antony Blinken, i cili njoftoi se Qeveria amerikane do ta pezullojë ndihmën financiare në vlerë më shumë se 95 milionë dollarë për Qeverinë e Gjeorgjisë.
“Pezullimet erdhën për veprimet antidemokratike dhe deklaratat e rrejshme të Qeverisë gjeorgjiane, të cilat nuk janë në përputhje me kushtet për anëtarësim në BE dhe në NATO. Derisa ndihma për Qeverinë do të pezullohet, Shtetet e Bashkuara do të vazhdojnë t’i ndihmojnë programet dhe aktivitetet në Gjeorgji të cilat e forcojnë demokracinë, sundimin e ligjit, mediat e pavarura dhe zhvillimin e ekonomisë”, tha Blinken.
Edhe Bashkimi Evropian e pezulloi ndihmën për Ministrinë e Mbrojtjes së Gjeorgjisë më 9 korrik. Në qershor, Parlamenti i Gjeorgjisë e kaloi një ligj për “agjentët e huaj”, të cilin Uashingtoni e cilëson si jodemokratik.
Ligji u kërkon organizatave që e marrin më shumë se 20 për qind të financimit të tyre nga vendet e jashtme, të regjistrohen si agjentë të ndikimit të huaj. Ai u kritikua nga partitë vendore dhe nga Perëndimi, të cilët thonë se ligji është i frymëzuar nga një ligj i ngjashëm rus për t’i luftuar kundërshtarët.
Në maj, Shtetet e Bashkuara vendosën regjim vizash dhe thanë se bashkëpunimi dypalësh me Gjeorgjinë do të rishikohet.
Lini një Përgjigje