FLASH
Shkruar nga Pamfleti
Aeroporti i Vjenës pezulloi përkohësisht operimet për shkak të reshjeve të dendura të borës. Sipas të dhënave zyrtare të aeroportit, janë anuluar të paktën 150 fluturime. Disa nisje dhe ulje mund të mos realizohen deri rreth mesditës, ndërsa vonesa priten gjatë gjithë ditës.
Gjatë natës ranë rreth 20 centimetra borë. Shërbimi dimëror punoi pa ndërprerje që nga mbrëmja e së enjtes dhe deri tani ka larguar rreth 1 mijë kamionë me afërsisht 15 mijë tonë borë.
Reshjet shkaktuan probleme të konsiderueshme edhe në autostrada. Autoritetet mbyllën përkohësisht një aks të rëndësishëm rrugor në periferi të Vjenës, ndërsa shumë rrugë në zonat malore u bënë të pakalueshme.
Në landin e Shtyrisë, rreth 30 mijë familje mbetën pa energji elektrike. Sipas të dhënave nga Energienetze Steiermark, një numër i madh stacionesh transformatorësh dolën jashtë funksionit.
Zjarrfikësit, policia dhe ekipet e shpëtimit vijuan punën pa ndërprerje. Autoritetet raportuan shumë aksidente rrugore dhe rënie pemësh mbi rrugë për shkak të peshës së borës. Reshjet pritet të ndalen gjatë ditës, ndërsa nga java e ardhshme parashikohet rritje e ndjeshme e temperaturave.
Lini një Përgjigje