FLASH
Shkruar nga Pamfleti
Rusia sulmon, Perëndimi hesht: 18 të vdekur në Kiev, mes tyre fëmijë...
Një prej sulmeve më të përgjakshme të këtij viti mbi Ukrainën u zhvillua sot nga forcat ajrore ruse, duke tronditur jo vetëm Kievin, por edhe gjithë arkitekturën e brishtë të përpjekjeve diplomatike për paqe.
Mediat ndërkombëtare, përfshirë CNN, WSJ dhe AP, raportojnë se sulmi përfshiu përdorimin masiv të raketave dhe dronëve, përfshirë raketa balistike dhe dronë iranianë Shahed, duke rezultuar në një valë shkatërrimi me pasoja të rënda njerëzore dhe materiale.
Forcat ajrore ruse lëshuan mbi 598 dronë dhe të paktën 31 raketa në drejtim të objektivave ukrainase, përfshirë qendrën e qytetit të Kievit. 563 dronë dhe 26 raketa u rrëzuan nga mbrojtja ajrore ukrainase, por pjesa tjetër goditi objekte civile, banesa, infrastrukturë kritike dhe ndërtesa diplomatike. Më tragjikja, 18 persona u konfirmuan të vdekur, përfshirë katër fëmijë, ndërsa mbi 38 të tjerë janë të plagosur. Dëmet më të mëdha u raportuan në distriktin Darnytskyi dhe pranë ndërtesës së Delegacionit të Bashkimit Evropian dhe British Council-it, duke tronditur rëndë simbolikën e pranisë perëndimore në Ukrainë.
Presidenti ukrainas Volodymyr Zelensky deklaroi se sulmi ishte "një krim i qëllimshëm kundër civilëve" dhe i bëri thirrje komunitetit ndërkombëtar të reagojë jo vetëm me deklarata, por me veprime konkrete. Liderët europianë kanë reaguar ashpër. Bashkimi Evropian dhe Britania e Madhe kanë thirrur ambasadorët rusë për të kërkuar shpjegime dhe për të paralajmëruar pasoja diplomatike. Ursula von der Leyen e cilësoi sulmin "barbar dhe të papranueshëm", ndërsa presidenti francez Macron kërkoi "sanksione më të thella dhe më të menjëhershme".
Rusia, nga ana e saj, deklaroi se objektiv i sulmit ishin strukturat ushtarake dhe logjistike, por dëmet në shkolla, spitale dhe qendra rezidenciale flasin ndryshe. Ky është sulmi i dytë i madh në pak javë, që përkon me përpjekjet diplomatike të presidentit amerikan Donald Trump për të ndërmjetësuar një zgjidhje paqësore. Ironikisht, çdo përpjekje e Trump për "armëpushim të menjëhershëm" po shoqërohet me përshkallëzim të dukshëm të dhunës.
Trump, që prej rikthimit të tij në Shtëpinë e Bardhë, e ka marrë personalisht barrën për të zgjidhur luftën në Ukrainë, por realiteti në terren flet për një dështim në rritje. Qasja e tij e butë dhe e bazuar në negociata pa kushte ndaj Rusisë, duket se ka inkurajuar Kremlinin të intensifikojë agresionin. Në vend që të frenojë Putinin, retorika e Trump dhe mungesa e vijës së kuqe e ka bërë më të rrezikshme situatën. Ai premtoi paqe, por ajo që shohim është më shumë gjakderdhje, më shumë destabilizim dhe më shumë sfidë ndaj rendit ndërkombëtar.
Ky zhvillim shënon jo vetëm një pikë kritike në luftën në Ukrainë, por edhe një sinjal alarmi për vetë legjitimitetin e lidershipit perëndimor në këtë krizë. Nëse presidenti i SHBA-së nuk mund të ndalojë dot masakra të tilla, atëherë cili është roli i vërtetë i Amerikës sot? A është paqeruajtës, apo një spektator i pafuqishëm përballë barbarisë? /Pamfleti
Lini një Përgjigje