FLASH
Shkruar nga Pamfleti
Irani ka ekzekutuar një shtetas të identifikuar si Bahman Choobiasl, i akuzuar për spiunazh në shërbim të agjencisë izraelite të inteligjencës, Mossad. Ai u dënua me vdekje dhe u var në kuadër të një vale të gjerë arrestimesh dhe ekzekutimesh që po ndodhin në Republikën Islamike, në kuadër të një fushate kundërspiunazhi ndaj infiltrimeve të pretenduara dhe rrjeteve të sabotazhit që, sipas autoriteteve, janë organizuar nga Izraeli në kuadër të “Operacionit Rising Lion”.
Sipas Teheranit, Choobiasl ishte një nga “spiunët më të besuar” të Mossad-it dhe kishte “takime të drejtpërdrejta me agjentë izraelitë”.
Pas përfundimit të Luftës së 12 ditëve, në të cilën pretendohet se Izraeli kishte futur qindra agjentë në territorin iranian për të goditur objektiva strategjikë, qeveria iraniane ka ndërmarrë qindra arrestime dhe një sërë ekzekutimesh. Vetëm në ditët e fundit, katër persona të tjerë janë dënuar me vdekje për bashkëpunim me shërbimet izraelite. Krimi i “inteligjencës me armikun”, sidomos në favor të “regjimit sionist”, dënohet me varje në Iran.
Në qershor, pas përfundimit të një fushate goditjesh izraelite ndaj objekteve bërthamore në Iran, u ekzekutuan tre burra të akuzuar për bashkëpunim me Mossad-in: Idris Ali, Azad Shojai dhe Rasoul Ahmad Rasoul. Ata akuzoheshin për futjen e pajisjeve të sofistikuara që ndihmuan komandot izraelite. Ekzekutimet u kryen në qytetin Urmia, pranë kufirit me Turqinë. Një tjetër, Ismail Fekri, gjithashtu i akuzuar si spiun, u ekzekutua në qershor.
Ajo që ka krijuar frikë në opinionin publik iranian është raportimi se mbi 700 persona janë arrestuar për lidhje të dyshuara me Mossad-in. Sipas disa burimeve, qëllimi i Izraelit nuk ishte vetëm sabotimi ushtarak, por krijimi i një rrjeti të fshehtë për të ndezur një revolucion nga brenda që do të çonte në përmbysjen e regjimit. Ky kontekst ka shtuar frikën e një spastrim të gjerë politik që mund të përfshijë jo vetëm spiunët, por edhe opozitarët civilë.
Policia iraniane ka deklaruar se gjatë konfliktit 12-ditor me Izraelin janë arrestuar rreth 21 mijë persona.
Ndërkohë, Garda Revolucionare ka njoftuar se tetë individë të tjerë janë arrestuar për përpjekje për të transmetuar koordinata të objekteve ushtarake dhe informacion për figura të rëndësishme të ushtrisë iraniane. Të gjithë janë dënuar me vdekje, nën akuzën e ndihmës ndaj Mossad-it për të lehtësuar sulmet mbi objektet bërthamore dhe për të vrarë komandantët më të lartë iranianë – ngjarje që janë përshkruar si goditja më e rëndë ndaj regjimit që nga lufta me Irakun.
Ky klimë represioni dhe pasigurie ka krijuar një ndjenjë të gjerë psikoze kolektive, ndërkohë që shërbimet iraniane të inteligjencës po përballen me kritika për moszbulimin në kohë të infiltrimeve masive të armikut.
Nga ana tjetër, lufta e spiunazhit është e dyanshme. Në Izrael, shërbimi i sigurisë Shin Bet ka arrestuar dy shtetas izraelitë, Maor Kringel dhe Tal Amran, të akuzuar për spiunazh në favor të Iranit. Ata dyshohet se fotografuan baza ushtarake dhe vende publike nën urdhërat e agjentëve iranianë, në këmbim të pagesave në kriptovalutë. Një tjetër i arrestuar është një rezervist i Forcave të Mbrojtjes të Izraelit, që dyshohet se ka kontaktuar me inteligjencën iraniane dhe ka dërguar informacione të ndjeshme.
Në Izrael, ndryshe nga Irani, spiunazhi nuk dënohet me vdekje, por të tre të ndaluarit mund të përballen me dënime të rënda nëse akuzat vërtetohen. /Inside Over
Lini një Përgjigje