FLASH
Shkruar nga Julian Borger
Biden kishte shprehur privatisht shqetësimin, se Netanyahu po përpiqet të tërheqë SHBA-në në një konflikt më të gjerë.
Një breshëri sulmesh me dronë dhe raketa u nisën të shtunën në mbrëmje nga Irani drejtë Izraelit dhe vazhduan deri në mëngjesin e hershëm të së dielës. Ky sulm u nxit pas atij që Izraeli bëri në ambasadën iraniane në Siri. Por mesa duket veprimet e Izraelit ishin të kalkuluar dhe pas fshiheshin disa plane “djallëzore” për të tërhequr SHBA-në në luftë.
Si Joe Biden ashtu edhe iranianët janë të vetëdijshëm se Benjamin Netanyahu në mënyrë ideale do të donte të shkatërronte objektet bërthamore të Iranit, të cilat ai i ka parë prej kohësh si një kërcënim ekzistencial për Izraelin.
Shkatërrimi i tyre në rrënoja do të ishte shumë i vështirë pa ndihmën e SHBA-së, por është e mundur që ai dhe skifterët e tjerë izraelitë të mund të përpiqen të shfrytëzojnë këtë mundësi për të përmbushur atë ambicie.
NBC News raportoi të shtunën mbrëma se disa zyrtarë të lartë të administratës janë "të shqetësuar se Izraeli mund të bëjë diçka shpejt në përgjigje të sulmeve të Iranit pa menduar për pasojat e mundshme më pas".
Raporti thoshte se Biden kishte shprehur privatisht shqetësimin se Netanyahu po përpiqet të tërheqë SHBA-në më thellë në një konflikt më të gjerë, duke cituar tre persona të njohur me komentet e presidentit.
Në afat të shkurtër, Uashingtoni mund të ngushëllohet nga disa shenja se çdo përgjigje izraelite nuk do të jetë të paktën e menjëhershme. Izraeli ka bërë thirrje për një seancë të Këshillit të Sigurimit të OKB-së për sulmin, i cili do të ndodhë në orën 16:00 me orën e Nju Jorkut të dielën. Do të ishte befasuese nëse një kundërsulm do të nisej para asaj seance.
Një tjetër shenjë e mundshme që përgjigja mund të heshtet, ishte biseda e Yoav Gallant me homologun e tij amerikan, Lloyd Austin, pas sulmeve.
Sipas ministrisë izraelite të mbrojtjes, Gallant "theksoi se struktura e mbrojtjes është e përgatitur për çdo përpjekje të mëtejshme për të sulmuar shtetin e Izraelit". Komentet e tij nuk përmendnin kthimin e Izraelit.
Një shenjë e tretë pozitive në orët e para të së dielës ishte një siguri nga një zyrtar izraelit i cituar nga New York Times se "përgjigja e Izraelit do të koordinohej me aleatët e tij"./Përshtati “Pamfleti” nga “The Guardian”
Lini një Përgjigje