FLASH
Shkruar nga Pamfleti
Gjykata e Lartë e Italisë ka konfirmuar sot përfundimisht pafajësinë e ministrit italian të Infrastrukturës, Matteo Salvini, në procesin penal të njohur si “Open Arms”, duke rrëzuar përfundimisht ankimimin e paraqitur nga Prokuroria e Palermos. Vendimi i Gjykatës së Kasacionit vulos kështu mbylljen përfundimtare të një prej çështjeve më të ndjeshme politike dhe gjyqësore në Itali në vitet e fundit, që kishte në qendër politikat ndaj emigracionit.
Salvini, i cili në kohën e ngjarjeve ishte ministër i Brendshëm (gusht 2019), ishte akuzuar për privim të paligjshëm lirie dhe refuzim për të kryer detyrën zyrtare, pasi refuzoi zbarkimin e 147 emigrantëve, të shpëtuar në det nga organizata joqeveritare spanjolle Open Arms.
Në dhjetor 2024, Gjykata e Palermos e kishte shpallur të pafajshëm Salvini “sepse mungon fakti”, duke argumentuar se nuk kishte prova të mjaftueshme për të provuar akuzat. Prokuroria e Palermos e kishte apeluar menjëherë vendimin, duke ndjekur procedurën e ashtuquajtur “për saltum”, pra duke ankimuar direkt në Kasacion pa kaluar në apel.
Sot, Gjykata e Kasacionit ka rrëzuar këtë ankim, duke mbështetur vendimin e mëparshëm dhe duke e bërë kështu përfundimtare pafajësinë e ish-ministrit.
Avokatja mbrojtëse e Salvinit, Giulia Bongiorno, e kishte quajtur ankimimin të pajustifikueshëm dhe të bazuar në interpretime të pasakta të rrethanave. “Prokuroria ka paraqitur një ankim të përgjithshëm, që kërkon një proces krejtësisht tjetër nga ai që është zhvilluar, pa baza të qëndrueshme ligjore,” kishte deklaruar ajo.
Ajo theksoi gjithashtu se nuk mund të krahasohet çështja Open Arms me rastin Diciotti, pasi në rastin e parë bëhet fjalë për një anije të një OJQ-je spanjolle, ndërsa në të dytin për një anije të Gardës Bregdetare italiane. “Raportet zyrtare tregojnë se nuk ka pasur asnjë formë të privimit të paligjshëm të lirisë,” shtoi avokatja.
Vendimi i sotëm shihet si një fitore politike për Salvini-n, i cili ka qenë për vite me radhë një nga figurat më të zëshme në Itali kundër migracionit të paligjshëm dhe ka bërë pjesë të politikës së tij ndalimin e zbarkimeve të OJQ-ve që shpëtojnë emigrantë në Mesdhe.
Lini një Përgjigje