FLASH
Shkruar nga Pamfleti
Udhëheqësi rus sulmon militarizimin e BE-së, nuk përmend fare SHBA...
Siç ndodh gjithmonë gjatë vizitave të tij në Kinë, Vladimir Putin dha një intervistë për agjencinë “Xinhua”, gjatë së cilës trajtoi temat më aktuale të gjeopolitikës dhe gjendjen e botës, pa përmendur asnjëherë Shtetet e Bashkuara. Një rrethanë që në pamje të parë duket e çuditshme, sidomos pas asaj që ndodhi muajin e kaluar mes Alaskës dhe Uashingtonit, por që bëhet plotësisht e kuptueshme po të merret parasysh publiku dhe audienca të cilëve po u drejtohej presidenti rus.
Pasi shprehu respekt për mikpritësin e ardhshëm, Xi Jinping, “një lider i vërtetë i një fuqie të madhe me një vizion strategjik të gjerë”, dhe përmendi marrëdhëniet ekonomike mes Moskës dhe Pekinit që, sipas tij, kanë arritur “një nivel të paparë më parë”, Putin solli në skenë konceptin e “Shumicës Globale”. Me këtë term, ai nënkuptoi atë masë kritike të vendeve të Jugut Global që përfaqësojnë një rend të ri multipolar, të cilin Kremlini e ka teorizuar prej kohësh. “Ne dhe Kina ndajmë interesa të gjera të përbashkëta dhe qëndrime jashtëzakonisht të ngjashme mbi çështjet thelbësore. Jemi të bashkuar në vizionin tonë për ndërtimin e një rendi botëror të drejtë dhe multipolar, me fokus të veçantë te vendet e Shumicës Globale”, tha ai.
Por presidenti rus nuk u mjaftua me fjalë të përgjithshme: ai tregoi edhe vendin ku, sipas tij, duhet të nisë ndryshimi, në mos përmbysja, e raporteve globale të forcës. Duke iu referuar me zgjuarsi rezolutës së Asamblesë së Përgjithshme të OKB-së të 4 dhjetorit 2024 me titull “Shkulja e kolonializmit në të gjitha format dhe shfaqjet e tij”, Putin deklaroi se Rusia dhe Kina “mbështesin reformën e OKB-së me qëllim që të rikthejë plotësisht autoritetin e saj dhe të pasqyrojë realitetet e sotme”, duke kërkuar veçanërisht reformimin e Këshillit të Sigurimit “për ta bërë më demokratik dhe për të përfshirë shtete nga Azia, Afrika dhe Amerika Latine”.
Shqiponja me dy koka, simboli i Rusisë, ka qenë gjithmonë simetrike vetëm në dukje. Për pjesën më të madhe të historisë së saj, ajo ka parë drejt Perëndimit. Por pas rënies së Bashkimit Sovjetik, dhe shumë përpara se Putin të vinte në pushtet, Rusia filloi të shikojë nga Lindja. Që në vitin 1993, “Koncepti i Politikës së Jashtme” ishte dokumenti i parë zyrtar që e pranoi Azinë si “një nga qendrat e ekonomisë dhe politikës botërore”, duke theksuar se për t’u bërë aktor i rëndësishëm në rajon, mjaftonte “të mos përsëritej përvoja evropiane”. Ideja për një hapësirë të madhe euroaziatike është pra e vjetër për Rusinë, por tashmë Xi Jinping është kthyer në “aksionarin kryesor” të saj, jo vetëm në kuadër të BRICS-it, por edhe si lider i një areali të gjerë që përfshin Amerikën Latine dhe Afrikën, në sfidë të hapur me rendin e vjetër botëror.
“Euroazia pa Perëndimin: Kina do të tregojë një botë të re”, ky është titulli i redaksionalit të agjencisë shtetërore ruse RIA Novosti, që shënon nisjen e vizitës së Putinit në Kinë. “Po, është një sfidë. Më saktë, një mospajtim me Perëndimin, dhe para së gjithash me Shtetet e Bashkuara, që vetëshpallen garantët e sigurisë globale. Epoka koloniale e dominimit të tyre në Azi ka përfunduar prej kohësh, por ndikimi dhe interesat e tyre nuk janë zhdukur. Atlantistët vazhdojnë të përpiqen të ‘drejtojnë popujt’ e Azisë, duke i shfrytëzuar kontradiktat e tyre, madje ndonjëherë duke i vënë hapur kundër njëri-tjetrit.”
Putin nuk ngurroi të theksojë hendekun që tashmë ndan këto dy botë. “Në Rusi, nuk do ta harrojmë kurrë rezistencën heroike të Kinës. Shohim që në disa shtete perëndimore, rezultatet e Luftës së Dytë Botërore po rishikohen në mënyrë të qëllimshme. Militarizmi japonez po ringjallet nën pretekstin e kërcënimeve imagjinare nga Rusia apo Kina, ndërsa në Evropë, përfshirë Gjermaninë, po hidhen hapa drejt rimilitarizimit të kontinentit, me shumë pak vëmendje ndaj paralelizmit historik.”
E gjithë kjo do të ishte e kuptueshme... nëse gjatë kësaj vere Kremlini nuk do t’i kishte buzëqeshur gjerësisht Amerikës së Donald Trump. Në Anchorage të Alaskës u zhvillua një takim historik me fotografi simbolike, që sipas shumë analistëve rusë, “i lejojnë Putinit të shkojë te aleati i tij më i rëndësishëm, jo si vasal, por si lider botëror që flet kokë më kokë me presidentin e Shteteve të Bashkuara, rivali kryesor i Kinës”. Edhe për këtë arsye, mospërmendja e SHBA-ve duket si një shmangie e qëllimshme, një temë e sikletshme që më mirë të anashkalohet.
Putin është mysafiri kryesor i samitit të Organizatës për Bashkëpunim të Shangait që zhvillohet nga sot deri më 1 shtator në Tianjin, së bashku me liderët e Indisë, Iranit, Turqisë dhe disa shteteve të tjera që kanë marrëdhënie të vështira me Shtëpinë e Bardhë. Një lloj "asamble e përgjithshme" e Jugut Global, e bashkuar edhe nga një dozë e fortë anti-amerikanizmi. Pas këtij samiti, pritet edhe një paradë ushtarake me rastin e 80-vjetorit të fitores kineze në Luftën e Dytë Botërore. /Përshtatur nga Corriere Della Sera
Lini një Përgjigje