FLASH
Shkruar nga Pamfleti
Departamenti Amerikan i Shtetit lëshoi të premten udhëzime për të gjitha konsullatat amerikane jashtë vendit që të fillojnë kontrolle shtesë për ata që kanë aplikuar për viza për të ndjekur Universitetin e Harvardit , për çfarëdo arsye.
Sipas një kabllogrami diplomatik të siguruar nga Reuters, ky është një tjetër veprim që zgjeron masat e rrepta të Presidentit Donald Trump ndaj universitetit.
Në një kabllogram të datës së sotme dhe të dërguar në të gjitha misionet diplomatike dhe konsullore të SHBA-së, Sekretari i Shtetit i SHBA-së, Marco Rubio, urdhëron që të fillojë menjëherë "kontroll shtesë" për individët që kanë aplikuar për një "vizë jo-imigruese" dhe "dëshirojnë të udhëtojnë në Universitetin e Harvardit për çfarëdo qëllimi".
Aplikime të tilla mund të jenë paraqitur nga studentë të ardhshëm, individë që studiojnë tashmë në universitet, punonjës, kontraktorë, folës të ftuar dhe madje edhe turistë.
Universiteti i Harvardit nuk ka arritur të ruajë "një mjedis kampusi pa dhunë dhe antisemitizëm", pohon telegrami, duke vënë në dukje se masat e shtuara të shqyrtimit synojnë të ndihmojnë zyrtarët konsullorë të identifikojnë aplikantët për vizë që kanë një "histori ngacmimi dhe dhune antisemite".
Në të kaluarën, SHBA-të kërkonin kontrolle shtesë për njerëzit nga vende të caktuara. Zbatimi i procedurave të tilla kundër Harvardit duket të jetë një përdorim i paprecedentë i procesit të vizave kundër një universiteti që ka rënë në sy të keq.
Sipas telegramit, zyrtarët konsullorë duhet të marrin në konsideratë vënien në pikëpyetje të besueshmërisë së aplikantit nëse llogaritë e tij në mediat sociale nuk janë publike.
“Nëse nuk jeni plotësisht të bindur se aplikanti, ndërsa ndodhet në Shtetet e Bashkuara, do të angazhohet në aktivitete në përputhje me statusin e vizës së tij ose të saj jo-imigruese, duhet ta refuzoni vizën”, thuhet në tekst.
Kohët e fundit, Rubio ka deklaruar se ai personalisht ka revokuar vizat e qindra, ndoshta mijëra njerëzve - përfshirë studentë - sepse ata ishin të përfshirë në aktivitete që bien ndesh me prioritetet e politikës së jashtme amerikane.
"Nëse vini këtu për të shkaktuar telashe, ndoshta do të keni telashe", u tha Rubio gazetarëve më 7 prill.
Dekani i Harvardit: "Mirë se vini anëtarë... nga e gjithë bota"
Në të njëjtën kohë, dekani i Harvardit nisi një “sulm” ndaj presidentit amerikan, pas përpjekjeve të administratës Trump për të ndaluar universitetin të pranonte studentë të huaj, një plan që u bllokua nga një gjykatës federal.
Duke folur në ceremoninë e diplomimit për gjeneratën e vitit 2025, Alan Garber iu drejtua studentëve dhe anëtarëve të komunitetit të Harvardit, duke thënë: “mirë se vini anëtarë të gjeneratës së vitit 2025... nga i gjithë vendi dhe nga e gjithë bota.” Fjalët e tij morën duartrokitje të forta dhe pastaj ai përsëriti: «nga e gjithë bota, siç duhet të jetë».
Turma e duartrokiti përsëri rektorin.
Lini një Përgjigje