FLASH
Shkruar nga Pamfleti
Trump mohon dislokimin e trupave, ndërsa një profesor amerikan paralajmëron për pasoja të rënda ushtarake dhe politike
Ndërsa lufta mes SHBA-së, Izraelit dhe Iranit vazhdon me sulme të pandërprera, presidenti amerikan Donald Trump deklaroi se Shtetet e Bashkuara nuk kanë dislokuar trupa në Iran.
“Nëse kjo do të ishte e vërtetë, sigurisht që nuk do t’jua thosha, por nuk po dërgoj trupa”, u shpreh Trump gjatë një konference për shtyp në Shtëpinë e Bardhë.
Megjithatë, sipas një sondazhi të Reuters/Ipsos, rreth 65% e amerikanëve besojnë se presidenti Trump mund të urdhërojë një sulm të gjerë tokësor ndaj Iranit, ndërsa vetëm 7% e mbështesin këtë ide.
Profesori John Mearsheimer, ekspert i marrëdhënieve ndërkombëtare në Universitetin e Çikagos, ishte i ftuar në emisionin e Andrew Napolitano në YouTube, ku analizoi përplasjet mes SHBA-së, Izraelit dhe Iranit, si dhe zhvillimet në Ngushticën e Hormuzit.
Sipas Mearsheimer, një përpjekje e SHBA-së për të zbarkuar trupa në këtë zonë mund të shndërrohet në një ngërç të madh, të ngjashëm me Betejën historike të Gallipolit. Ai theksoi se një operacion i tillë do të ishte i vështirë për t’u realizuar shpejt për shkak të sfidave gjeografike dhe logjistike, duke paralajmëruar për kosto të larta ushtarake dhe politike për SHBA-në.
Profesori amerikan paralajmëroi se një skenar i tillë, të cilin e quajti “një Gallipoli i dytë”, mund të rrisë paqëndrueshmërinë si në rajon, ashtu edhe në nivel global.
Mearsheimer deklaroi gjithashtu se përfshirja e SHBA-së në luftë kundër Iranit nuk justifikohet nga interesi kombëtar amerikan.
“Kjo luftë po zhvillohet për Izraelin. Amerika nuk kishte asnjë interes kombëtar për të luftuar Iranin”, tha ai.
Ai shtoi se administrata Trump është tërhequr në këtë luftë nga Izraeli dhe nga qarqe pro-izraelite brenda SHBA-së.
Duke vlerësuar ecurinë e luftës në terren dhe rolin e SHBA-së, ai u shpreh se “kjo luftë po shkon shumë keq. Pothuajse askush që njoh nuk mund të shpjegojë se si do ta fitojmë këtë luftë.”
Ai theksoi se vendet evropiane dhe aleatë të tjerë po mbajnë distancë nga konflikti, pasi besojnë se lufta është e destinuar të humbet dhe për këtë arsye nuk duan të përfshihen.
Çfarë ishte Beteja e Gallipolit
Beteja e Gallipolit (prill 1915-janar 1916) ishte një fushatë e pasuksesshme e Antantës gjatë Luftës së Parë Botërore, me synim kontrollin e Dardaneleve dhe pushtimin e Kostandinopojës. Rezistenca e fortë e Perandorisë Osmane shkaktoi humbje të mëdha për forcat aleate (rreth 130 mijë të vdekur), duke çuar në një tërheqje të turpshme.
Lini një Përgjigje