FLASH
Shkruar nga Pamfleti
Organizatat italiane japin alarmin për Gjadrin...
Në vitin 2024, sistemi i Qendrave të Qëndrimit për Ri-atdhesim (Cpr) shënoi një rekord negativ: vetëm 10,4% e personave që kanë marrë një urdhër largimi u riatdhesuan nga qendrat italiane. Të dhënat zyrtare, të mbledhura përmes kërkesave të aksesit publik në Ministrinë e Brendshme dhe të përfshira në platformën “Trattenuti”, një projekt i përbashkët i ActionAid Italia dhe Departamentit të Shkencave Politike të Universitetit të Barit, tregojnë se efektiviteti është në nivelet më të ulëta historike. Ky raport vjen edhe pas një vendimi të Gjykatës Kushtetuese, e cila ka kritikuar ligjin mbi funksionimin e Cpr-ve, duke e quajtur “plotësisht të papërshtatshëm për të përcaktuar qartë të drejtat e personave të ndaluar”.
Përveç denoncimeve të vazhdueshme mbi kushtet e këqija dhe vuajtjet brenda këtyre qendrave, raporti ngre alarmin edhe për koston e tyre të lartë, veçanërisht në rastin e qendrës së hapur në Shqipëri në tetor 2024. Sekretarja e Partisë Demokratike, Elly Schlein, deklaroi: “Giorgia Meloni duhet t’u kërkojë falje italianëve, sepse shifrat e kostos së kësaj operacioni të paligjshëm janë një fyerje për miliona njerëz që sot po përballen me vështirësi ekonomike”.
Riatdhesime gjithnjë e më të pakta
Arsyeja kryesore e ekzistencës së këtyre qendrave ka qenë gjithmonë efektiviteti në politikat e riatdhesimit të emigrantëve të parregullt. Por të dhënat tregojnë të kundërtën: në vitin 2024 u arrit rekordi më i ulët që nga 2014-a, vetëm 41,8% e personave që hynë në një qendër u riatdhesuan (2.576 nga 6.164 persona gjithsej), më pak se vitet 2022 (3.154) dhe 2023 (2.987), edhe pse qeveria Meloni rriti buxhetet dhe zgjati periudhën e ndalimit deri në 18 muaj.
Kosto të larta, rezultate minimale
Me një kapacitet zyrtar prej 2.555 vendesh mes Cpr dhe Ctra (qendra të reja për kërkuesit e azilit, hapur në Modica, Porto Empedocle dhe Gjader, Shqipëri), sistemi funksionoi vetëm me 46% të kapacitetit për shkak të vonesave, protestave dhe dëmeve. Vetëm në Caltanissetta, që pati 1.407 hyrje, u shpenzuan 1,9 milionë euro, me kosto mesatare ditore për person 28,97 euro, nën mesataren kombëtare. Në Ctra të Porto Empedocle (124 hyrje) kostoja ishte 37,22 euro, me shpenzime mbi 1,1 milionë euro – 95,8% e të cilave shkuan për përgatitjen e vetëm 50 vendeve.
Por krahasimi me qendrën e Gjadrit është tronditës: ndërtimi i një vendi efektiv atje kushtoi mbi 153 mijë euro, ndërsa kostoja ditore për person është 76,57 euro, mbi dyfishin e mesatares kombëtare.
Operacioni në Shqipëri, një shpenzim gjigant
Nga tetori deri në fund të dhjetorit 2024, Prefektura e Romës pagoi 570 mijë euro për vetëm pesë ditë operimi të qendrës së Gjaderit, ose 114 mijë euro në ditë për 20 persona, të cilët u liruan brenda disa orësh. Deri në mars 2025 ishin krijuar 400 vende, me shpenzime të kontraktuara (shumica me procedurë të drejtpërdrejtë) që arritën 74,2 milionë euro, përfshirë strukturat në portin e Shëngjinit. “Duke pasur 263 vende bosh në 1.164 vendet ekzistuese në Itali, përdorimi i Gjaderit për ndalimin e emigrantëve të parregullt është krejtësisht i pakuptimtë”, thekson ActionAid. "Operacioni Albania është instrumenti më i kushtueshëm, çnjerëzor dhe i padobishëm në historinë e politikave italiane të migracionit ", shpjegon shoqata.
Rritje e kërkuesve të azilit në qendrat e ndalimit
Një tjetër ndryshim i madh është rritja e kërkuesve të azilit në këto qendra, nga 9% në vitin 2021, në 29% në vitin 2024, shpesh pa pasur urdhër largimi, por vetëm për shkak të statusit të tyre të pasigurt. Në dy vitet e fundit, 186 persona u ndaluan padrejtësisht dhe më pas u liruan, megjithëse kishin të drejtë për pritje humanitare.
Pjesa më e madhe e të ndaluarve janë shtetas tunizianë (50,5% e hyrjeve vjetore 2019–2024), të cilët janë edhe më të riatdhesuarit falë marrëveshjes dypalëshe me Tunizinë. Por ndikimi mbi emigracionin është minimal: deri më 24 korrik 2025, kishin mbërritur 35.483 persona, nga të cilët vetëm 657 ishin tunizianë (1,85% e totalit). /Përshtatur nga Il Fatto Quotidiano”
Lini një Përgjigje