FLASH
Shkruar nga Pamfleti
Mitsotakis ka kërkuar që Beleri të betohet, qoftë edhe nga qelia, duke theksuar se heqja e kësaj mundësie do të shkaktojë probleme në marrëdhëniet mes dy vendeve.
Kryeministri grek Kyriakos Mitsotakis nga konferenca tradicionale për shtyp dhënë në mediat greke në kuadrin e Panairit Ndërkombëtar të Selanikut ka folur edhe për çështjen e kryebashkiakut të zgjedhur të Himarës Fredi Beleri, i cili ndodhet në burg prej 12 majit për blerje votash.
Mitsotakis ka kërkuar që Beleri të betohet, qoftë edhe nga qelia, duke theksuar se heqja e kësaj mundësie do të shkaktojë probleme në marrëdhëniet mes dy vendeve.
"Unë nuk ndërhyj në gjykimin e drejtësisë shqiptare, shprehet kryeministri grek, por heqja e mundësisë së Fredi Belerit për t’u betuar si kryetar bashkie, edhe me statusin e personit të paraburgosur, përbën shkelje të rregullave të shtetit ligjor”, u shpreh Mitsotakis.
"Sot mbushen 129 ditë nga burgosja e kryebashkiakut të zgjedhur të Himarës Fredi Beleri. Përvec Greqisë, lirimin e tij ka kërkuar edhe Parlamenti Europian, ndërsa është pozicionuar edhe ministria e Jashtme e SHBA. Cilat janë lëvizjet e mëtejshme të Athinës tek lojërat dhe marifetet e Tiranës përballë minoritetit grek në një moment kur Shqipëria është edhe vend kandidat për BE për gati 9 vjet?", u pyet Mistotakis nga gazetari grek.
Gjatë fjalës së tij, ai u shpreh se moslejimi i betimit të Belerit krijon probleme të mëdha në marrëdhëniet tona dypalëshe dhe do të ketë pasoja më të gjera nëse kjo politikë vazhdon gjatë përpjekjeve të Shqipërisë për t’iu afruar familjes evropiane.
“Jam pozicionuar vazhdimisht për këtë çështje, e cila fatkeqësisht hedh një hije mbi marrëdhëniet dypalëshe me Shqipërinë dhe përmbys në një masë të madhe progresin e rëndësishëm që kemi bërë në katër vitet e mëparshme. Më duhet t’ju them se më shqetëson veçanërisht fakti jo vetëm i burgosjes së kryebashkiakut të zgjedhur të Himarës, por mbi të gjitha fakti që edhe sot Shqipëria refuzon të bëjë të vetëkuptueshmen, për t’i dhënë atij mundësinë edhe nga burgu për t’u betuar si kryetar bashkie. Është një mesazh që unë ia kam përcjellë në çdo mënyrë udhëheqjes së Shqipërisë.
Kjo që po them i referohet një vendimi administrativ, unë nuk ndërhyj në gjykimin e drejtësisë shqiptare, do të ishte shumë e vështirë dhe e pahijshme nga ana ime ta bëja këtë, por heqja e mundësisë së Fredi Belerit për t’u betuar si kryetar bashkie, edhe me statusin e personit të paraburgosur, përbën sipas mendimit tonë, shkelje të qartë të rregullave të shtetit ligjor, krijon probleme të mëdha në marrëdhëniet tona dypalëshe dhe mendoj se do të ketë pasoja më të gjera nëse kjo politikë vazhdon gjatë përpjekjeve të Shqipërisë për t’iu afruar familjes evropiane.
I kam ngulitur thellë kujtimet dhe përvojat nga vizita ime në Himarë në fund të vitit të kaluar. Besoj se minoriteti kombëtar grek, i njohur si pakicë kombëtare, duhet të ndjejë se tek Greqia ka një aleat për të vetëkuptueshmen, që është mbrojtja e të drejtave të saj. Dhe flasim për të drejtat e pronësisë, flasim dhe për të drejta të barabarta për të marrë pjesë në veprimtarinë politike të Shqipërisë. Uroj dhe shpresoj që kësaj çështje t’i jepet një zgjidhje sa më shpejt. Në çdo rast, nuk do të ndalem së ngrituri këtë çështje në nivel europian apo edhe drejtpërdrejt me kryeministrin Rama herën tjetër që do ta takoj”, u përgjigj kryeministri grek.
Lini një Përgjigje