FLASH
Shkruar nga Pamfleti
5 vatra zjarri janë regjistruar gjatë 72 orëve të fundit në rrethin e Vlorës. Kryesisht në fshatin Dukat, Penkovë, Kërkovë por edhe në Vlorë. Deri më tani, nuk ka asnjë person të arrestuar ndërsa nga forcat zjarrfikëse bëhet apel për bashkëpunim edhe me Policinë e Shtetit.
Kastriot Begaj, shef i sektorit të Ndërhyrjes në repartin e Zjarrfikëses Vlorë, konfirmon se situata ka qenë problematike ndërsa dëmet janë të konsiderueshme.
Zjarret janë kryesisht të qëllimshme ndërsa jemi ende larg stinës së nxehtë dhe në Vlorë kanë qenë të shumta.
Referuar masave, Begaj konfirmon se forcat zjarrfikëse janë në gatishmëri ndërsa ajo çfarë kërkohet është edhe pajisja e këtyre të fundit me mjetet e nevojshme dhe logjistikën e duhur. Problematikë mbetet edhe zona e bashkisë Selenicë pasi ka vetëm një mjet dhe në shumë raste ndihma vjen nga Vlora. Zjarre në këtë periudhë ka pasur edhe në banesa, të shkaktuara kryesisht nga pakujdesia apo energjia elektrike.
Forcat zjarrfikëse kanë aktualisht në Vlorë 41 efektivë, ndërsa përpara është një sezon ku priten sërish situata problematike nga zjarret.
Ndërkohë, një vatër e madhe zjarri është shfaqur në masivin pyjor në fshatin Mazhicë të Bulqizës. Zjarri po përhapet në një sipërfaqe të konsiderueshme me drurë lisi që ndodhen mbi fshat.
Lini një Përgjigje