FLASH
Shkruar nga Pamfleti
Besa i ka bërë një nisje pozitive sezonit të ri, pasi në tri javët e para njeh vetëm fitore. Por sot një tjetër lajm i mirë ka ardhur për futbolldashësit e qytetit të Kavajës.
Këtë mëngjes në stadium janë parë mjetet e rënda që kanë nisur me shembjen e tribunës dhe pastrimin e gjithë zonës, për t'i hapur rrugë ndërtimit të ri të pjesshëm.
Veç tribunës, stadiumi i Besës në Kavajë ka nevojë edhe për fushën e re dhe sistemimin e tribunave të tjera, si edhe ndërtimin nga e para të gjithë infrastrukturës.
Dihet që prej vitesh klubi i futbollit vuan mungesën e infrastrukturës, pasi stadiumi i qytetit ka degraduar plotësisht. Mesa duket kryebashkiaku Fisnik Qosja po e mban premtimin e dhënë, ku pati deklaruar se në shtator nis puna për rindërtimin e stadiumit, në mënyrë që skuadra kur të kthehet në Superiore të ketë edhe shtëpinë e saj gati.
Kujtojmë se më shumë se një vit më parë edhe kryeministri Edi Rama premtoi se do kishte ndërhyrje në stadiumin e Besës së Kavajës.
Sot ka nisur zyrtarisht prishja e stadiumit të vjetër, që i hap radhën ndërtimit të impiantit të ri, duke bërë që Besa e futbollit të kthehet te lavdia e emrit që mbart.
Lini një Përgjigje