FLASH
Shkruar nga Pamfleti
Lamine Jamal nuk është ende një legjendë dhe rruga për të arritur nivelin e figurave si Pele, Maradona apo Mesi mbetet e gjatë. Megjithatë, talenti 18-vjeçar po vendos standarde që po entuziazmojnë tifozët e Barcelonës dhe po e shndërrojnë në një nga emrat më të rëndësishëm të ekipit këtë sezon.
Forma e tij ka shënuar rritje të dukshme, duke e kthyer Jamalin në një lojtar kyç për katalanasit. E përditshmja spanjolle “El Mundo Deportivo” vëren se ai ka tejkaluar pritshmëritë si në gola ashtu edhe në asistime, duke u shndërruar në motorin që tërheq përpara gjithë skuadrën.
Deri tani, Jamal ka realizuar 14 gola dhe ka dhënë 13 asistë në të gjitha kompeticionet, përfshirë La Ligën dhe Champions League, në 29 ndeshje të luajtura. Kjo do të thotë se kontributi i tij për gol është pothuajse një për çdo sfidë, ndërsa ndikimi i tij në lojë shkon përtej shifrave.
Në moshën 18-vjeçare, Jamal ka shënuar 39 gola me fanellën e Barcelonës që prej debutimit me ekipin e parë, një shifër që Lionel Mesi nuk e arriti në të njëjtën moshë. Ai ka kaluar gjithashtu totalin e golave të Diego Armando Maradonës me Barcelonën, i cili u ndal në 38.
Megjithatë, krahasimi kërkon kujdes. Maradona realizoi 38 gola në 58 ndeshje, ndërsa Jamalit i janë dashur 135 paraqitje për të arritur këtë shifër. Ndërkohë, Mesi pati nevojë për 98 ndeshje për të shënuar 38 gola.
Në aspektin e trofeve, Jamal ka fituar Kampionatin Europian me Spanjën, dy tituj kampion në La Liga me Barcelonën, Kupën e Mbretit dhe dy Superkupa të Spanjës, të gjitha me klubin katalanas.
Lini një Përgjigje