FLASH
Shkruar nga Pamfleti
Ai tha se ata i kërkuan Kosovës të bënte ndryshime zgjedhore, por nuk ushtronin presion mbi partinë e vetme politike të serbëve etnikë për të marrë pjesë në votim...
Kryeministri i Kosovës, Albin Kurti këtë të enjten u ankua për njëanshmëri ndaj vendit të tij nga Shtetet e Bashkuara dhe Bashkimi Evropian dhe tolerancë ndaj atij që ai e quajti regjimi autoritar i Serbisë.
Në një intervistë për “The Associated Press”, ai tha se i dërguari i BE-së për dialogun Kosovë-Serbi, Miroslav Lajçak dhe ai i SHBA-së për Ballkanin Perëndimorë, Gabriel Escobar, po i drejtohen Kosovës me kërkesat e Serbisë, derisa tha se sjellja pozitive ndaj një autokrati, nuk e bën atë të mirë.
“Ne këmbëngulim që të sillesh mirë me një autokrat nuk e bën atë të sillet më mirë. Përkundrazi. Të dërguarit e SHBA-së dhe BE-së për bisedimet Kosovë-Serbi – përkatësisht Escobar dhe Lajçak – vijnë tek ne me kërkesa, me kërkesat e palës tjetër ”, tha i pari i qeverisë së Kosovës,
Së fundmi serbët etnikë u përleshën me policinë e Kosovës dhe më pas me forcën paqeruajtëse të KFOR-it të udhëhequr nga NATO, duke lënë 30 ushtarë dhe mbi 50 serbë të plagosur dhe duke provokuar frikën e ripërtëritjes së konflikteve të përgjakshme në rajon.
Lars-Gunnar Wigemark, kreu në largim i Misionit të BE-së për Sundimin e Ligjit, i njohur si EULEX, tha se gjatë konfrontimit të dhunshëm të javës së kaluar “pati lëndime shumë të rënda nga disa ushtarë të KFOR-it”.
“Tashmë kishte dhunë të llojit më të keq. Të gjithë… thonë se jemi me fat që nuk pati viktima”, tha ai.
Pasi ushtarët u plagosën javën e kaluar, NATO tha se do të dërgonte 700 trupa shtesë në veri të Kosovës. Wigemark tha se do të vinte koha kur policia civile e EULEX-it, e cila nuk ka më kompetenca ekzekutive, nuk do të jetë e nevojshme në Kosovë. Por kushtet ende nuk janë aty, tha ai.
Diplomati evropian nuk përjashtoi që NATO mund të vendosë “mijëra trupa ushtarake” në Kosovë.
"Nëse situata po bëhet gjithnjë e më e paqëndrueshme, nëse fillon të përshkallëzohet përsëri, sigurisht, ky është një opsion", tha ai.
Përplasjet erdhën pas një konfrontimi të mëparshëm pasi kandidatët shqiptarë etnikë që u shpallën fitues të zgjedhjeve lokale në veri të Kosovës hynë në ndërtesat komunale për të marrë detyrën dhe u bllokuan nga serbët, të cilët bojkotuan votat me shumicë dërrmuese. Brukseli i ka kërkuar Kosovës që të tërheqë forcat e saj speciale të policisë nga veriu i Kosovës, ku jeton shumica e pakicës etnike serbe, dhe të mbajë zgjedhje të reja.
Në shkurt dhe mars, Kosova dhe Serbia arritën një marrëveshje të lehtësuar nga BE për normalizimin e marrëdhënieve, me një plan 11-pikësh për zbatim. Procesi mbetet në fokus të bisedimeve të ndërmjetësuara nga të dërguarit nga Uashingtoni dhe Brukseli.
Kurti këmbënguli se forcat speciale të policisë nuk mund të largoheshin derisa bandat kriminale serbe ose të largoheshin nga vendi ose të arrestoheshin. Ai tha se do të kishte paqe në Kosovë nëse nuk do të kishte “urdhra për dhunë nga Beogradi”.
“Fuqitë perëndimore nuk duhet të kënaqin Beogradin, problemin rrënjësor të dhunës në Ballkanin Perëndimor”, tha Kurti.
Kurti u ankua se edhe për zgjedhjet e parakohshme të prillit në katër komunat veriore me shumicë serbe, “ndërmjetësuesit ndërkombëtarë evropianë dështuan”.
Ai tha se ata i kërkuan Kosovës të bënte ndryshime zgjedhore, por nuk ushtronin presion mbi partinë e vetme politike të serbëve etnikë për të marrë pjesë në votim. Ai tha se do t'i duhej ndihma e bashkësisë ndërkombëtare për të nxitur pluralizmin politik në pakicën etnike serbe "për një konkurrencë të ndershme, për një garë demokratike për kryetarët e rinj të bashkive".
“Ne nuk mund të përballojmë një proces tjetër ku kandidatët serbë e bojkotojnë atë disa ditë para fillimit të zgjedhjeve, sepse kështu urdhëron Beogradi,” tha ai.
Wigemark, i cili gjithashtu ka shërbyer në Bosnje-Hercegovinë, tha se ishte jetike që këto lloj incidentesh të mos lejohen të shpërthejnë, e të kalojnë në një lloj konflikti të armatosur.
“Dialogu i vazhdueshëm ndërmjet Beogradit dhe Prishtinës, ky është vendi për të zgjidhur shumicën e çështjeve të pazgjidhura,” tha ai./Përshtati “Pamfleti” nga “Associated Press”
Lini një Përgjigje