FLASH
Shkruar nga Pamfleti
Presidenti i Serbisë, Aleksander Vuçiç, ka deklaruar që asnjëherë nuk do ta mbështesin anëtarësimin e Kosovës në Organizatën e Kombeve të Bashkuara.
Në një konferencë për mediat me ministrin e Punëve të Jashtme të Suedisë, Tobias Billström, Vuçiç tha se Kosova duhet të formojë asociacionin dhe pastaj Serbia do të përmbushë pjesën e saj të punës.
Më tej presidenti serb ka shtuar se qëndrimi i Serbisë është që nuk do të mbështesë anëtarësimin e Kosovës në Kombet e Bashkuara.
“Serbia nuk do ta mbështesë anëtarësimin e Kosovës në Kombet e Bashkuara dhe agjencitë dhe institucionet e specializuara të Kombeve të Bashkuara, për këtë i kam informuar qartë të gjithë ata që marrin pjesë në negociata, edhe palën tjetër”, është shprehur Vuçiç.
Ndërsa, diplomati suedez ka theksuar që presin zbatimin e të gjitha dispozitave të marrëveshjes dhe aneksit të saj, në mes të Kosovës dhe Serbisë.
Sipas Billström, tani do të jetë e rëndësishme që Serbia të përafrohet me BE-në dhe të zbatojë agjendën e saj të reformave.
“Tani do të jetë e rëndësishme që Serbia të përafrohet plotësisht me BE-në në lidhje me Rusinë dhe të zbatojë agjendën e saj të reformave. Sa i përket dialogut për normalizim presim që të gjitha dispozitat e marrëveshjes dhe aneksit të zbatohen menjëherë”, ka thënë Billström.
Lini një Përgjigje