FLASH
Shkruar nga Pamfleti
Rama shkarkon zv/ministrin Andrea Shllaku, duke e zëvendësuar atë me Pranvera Skanën...
Edi Rama duket se ka vendosur të pastrojë Ministrinë e Mbrojtjes nga besnikët e Pirro Vengut. Ky i fundit futi gjithë fisin e tij në ministri pasi u emërua te Mbrojtja, por duket se kryeministri ka nisur “fshesën”.
Në mbledhjen e sotme të qeverisë është larguar nga posti i zv/ministrit të Mbrojtjes Andrea Shllaku, djali i tezes së Pirro Vengut. Në vend të tij është emëruar Pranvera Skana.
Shllaku ka pasur poste kudo ku ka shërbyer Pirro Vengu. Ai ka shërbyer për 3 vjet si shef i kabinetit të Drejtorit të Përgjithshëm Ekzekutiv në Autoritetin Portual Durrës dhe më pas për dy vjet si Drejtor i Divizionit Operacional, duke mbikëqyrur operacionet portuale. Në atë kohë drejtor i portit ishte Vengu.
Kur ky i fundit u bë ministër, Shllaku u emërua Këshilltar i Jashtëm për Infrastrukturat Portuale pranë Ministrisë së Mbrojtjes. Ndërsa në dhjetor u bë zv/ministër.
Kur ata ishin te Porti i Durrësit, "Pamfleti" denoncoi se këta djem tezesh ishin drejtues të kompanisë shtetërore “Albanian Seaports Development Company”, e cila ka në dorë kompleksin e kullave që do ndërtojë Alabbar në Durrës.
Në këtë firmë Pirro Vengo ishte Administrator i Përgjithshëm e Anëtar Bordi; djali i tezes së tij, Andrea Shllaku ishte Kryetar Bordi. Pra nepotizmi në maksimum. Por duket se pas shkarkimit të Vengut, Rama ka vendosur dhe largimin e tij. /Pamfleti
Lini një Përgjigje