FLASH
Shkruar nga Pamfleti
Policia greke ka arrestuar tetë persona, përfshirë katër efektivë policie dhe katër shtetas shqiptarë, të dyshuar si anëtarë të një grupi kriminal që shpërndante drogë në Mykonos.
Grupi, i udhëhequr nga një oficer 42-vjeçar grek, rihidhte në treg lëndë narkotike të sekuestruara nga policia, duke bashkëpunuar me anëtarë të mafias greke dhe duke i informuar ata për kontrollet policore. Kreu i grupit, i pezulluar nga detyra që nga 14 janari 2025 për mashtrim, drejtonte operacionet bashkë me “krahun e djathtë”, një oficer 31-vjeçar që kishte shërbyer në Departamentin e Narkotikëve të Athinës Juglindore.
Dy shefa policie të tjerë, një 35-vjeçar nga Nëndrejtoria e Mykonos dhe një 43-vjeçar nga Departamenti i Akarnasit, ishin gjithashtu të përfshirë. Ndër bashkëpunëtorët civilë ishin një 24-vjeçar shqiptar, motra e tij 29-vjeçare (partnere e kreut të grupit), dhe dy shtetas të tjerë shqiptarë.
Hetimet zbuluan transaksione bankare me vlerë rreth 5 milionë euro në llogaritë e 42-vjeçarit dhe partneres së tij. Grupi komunikonte përmes aplikacioneve online dhe dyshohet se ka lidhje me raste të tjera kriminale, përfshirë informimin e biznesmenëve për kontrollet policore.
Në dosje përfshihen edhe 13 të dyshuar të tjerë, mes tyre një shef policie nga Pydna-Kolindros dhe tre individë me precedentë të rëndë kriminalë, të lidhur me një dosje të madhe për vrasjen e katër anëtarëve të mafias greke të cigareve, të drejtuar nga i shumëkërkuari “Entik” që fshihet në Dubai.
Arrestimi i 42-vjeçarit nisi më 23 tetor 2024 për mashtrim, kur u konfiskua telefoni i tij, duke zbuluar komunikime që konfirmuan rolin e tij në trafikimin e drogës dhe lidhjet me mafian greke. Autoritetet vazhdojnë hetimet për të zbardhur plotësisht rrjetin kriminal.
Lini një Përgjigje