FLASH
Shkruar nga Pamfleti
Një çështje e rëndë kriminale që tronditi Selanikun më shumë se një dekadë më parë rikthehet sërish në vëmendje, pasi një tjetër i dyshuar do të përballet me drejtësinë për grabitjen që përfundoi me vdekjen e një 65-vjeçari.
Një 46-vjeçar shqiptar është identifikuar nga autoritetet greke si pjesë e grupit që dyshohet se mori pjesë në ngjarje. Ai u lokalizua dhe u arrestua në Serbi, për t’u ekstraduar më pas në Greqi. Me vendim të autoriteteve gjyqësore, ai do të dalë para Gjykatës së Përzier me Juri, ku akuzohet për vrasje dhe grabitje në bashkëpunim.
Krimi që ndodhi në Toumba
Ngjarja daton më 27 shkurt 2013 dhe ndodhi në një pallat në zonën e Toumbës, në Selanik. Sipas hetimeve, autorët kishin siguruar më herët informacione për gjendjen ekonomike të 65-vjeçarit dhe kishin vëzhguar lëvizjet e tij për disa ditë.
Ditën e ngjarjes, ata dyshohet se e kanë çuar viktimën në bodrumin e godinës, ku e kanë lidhur dhe i kanë bllokuar frymëmarrjen. Si pasojë, 65-vjeçari humbi jetën nga asfiksia.
Pas kësaj, autorët morën sende me vlerë dhe çelësat e viktimës. Sipas dosjes hetimore, ata hynë më pas në banesë, ku ndodhej bashkëshortja e tij, dhe morën një shumë parash.
Katër persona të dënuar më herët
Për këtë çështje janë dhënë tashmë vendime të formës së prerë ndaj katër personave të tjerë.
Mes tyre ndodheshin ndihmësja shtëpiake e viktimës, bashkëshorti i saj dhe dy shtetas të huaj. Sipas akuzës, punonjësja e shtëpisë kishte informuar bashkëshortin e saj për gjendjen financiare të 65-vjeçarit, ndërsa ky i fundit dyshohet se kishte organizuar grabitjen.
Ndihmësja shtëpiake u dënua me 11 vite e 6 muaj burg, ndërsa tre të pandehurit e tjerë morën dënime me burgim të përjetshëm, të shoqëruara edhe me vite shtesë heqjeje lirie.
Lini një Përgjigje