FLASH
Shkruar nga Pamfleti
Kryeministri i ri i Mbretërisë së Bashkuar prezantoi kabinetin e tij të parë, duke kombinuar figura me përvojë nga fraksione të ndryshme të Partisë Laburiste, por duke larguar shumicën e bashkëpunëtorëve të afërt të Keir Starmerit.
Kryeministri i ri britanik, Andy Burnham, prezantoi të hënën kabinetin e tij të parë, duke shënuar një ndryshim të rëndësishëm në drejtimin e qeverisë dhe të Partisë Laburiste. Burnham kishte premtuar një ekip gjithëpërfshirës, por emërimet e para tregojnë gjithashtu një shkëputje të qartë nga epoka e paraardhësit të tij, Keir Starmer, pasi disa prej aleatëve më të afërt të ish-kryeministrit u larguan nga qeveria.
Surpriza më e madhe ishte emërimi i John Healey si ministër i Financave (Chancellor). Ish-ministri i Mbrojtjes, i cili dha dorëheqjen muajin e kaluar për shkak të mosmarrëveshjeve mbi financimin e ushtrisë, do të drejtojë tani politikën ekonomike të vendit. Healey konsiderohet një figurë me përvojë, që ka shërbyer në qeveritë e Tony Blair, Gordon Brown, Ed Miliband, Jeremy Corbyn dhe Keir Starmer. Ai pritet të mbështesë programin ekonomik të Burnhamit, i fokusuar te rindustrializimi, decentralizimi dhe nxitja e rritjes ekonomike.
Në Ministrinë e Brendshme mbetet Shabana Mahmood, e cila ruan postin e saj edhe në qeverinë e re. Ajo konsiderohet një nga figurat më konservatore të Laburistëve për çështjet e rendit publik dhe emigracionit, ndërsa gjatë muajve të fundit ka qenë një prej zërave që kanë kërkuar një qëndrim më të fortë të Londrës në mbështetje të njohjes së shtetit palestinez.
Një tjetër emër i rëndësishëm është Ed Miliband, ish-kryetar i Partisë Laburiste, i cili merr drejtimin e Ministrisë së Jashtme. Burnham i beson atij menaxhimin e politikës së jashtme, ndërsa pritet që qeveria e re të mbajë një qëndrim më kritik ndaj luftës në Gaza dhe të shqyrtojë rikthimin e objektivit për të dedikuar 0,7% të të ardhurave kombëtare për ndihmën ndërkombëtare.
Ndërkohë, Louise Haigh rikthehet në kabinet si ministre e Zyrës së Kabinetit, Sekretare e Parë e Shtetit dhe Kancelare e Dukatit të Lancasterit. Ajo konsiderohet një nga bashkëpunëtoret më të afërta të Burnhamit dhe do të ketë rol kyç në koordinimin e punës së ministrive dhe zbatimin e reformave të qeverisë.
Largime të rëndësishme
Riorganizimi solli largimin e disa prej figurave kryesore të kabinetit të Starmerit. Rachel Reeves humbi postin e ministres së Financave, ndërsa nga qeveria u larguan edhe ish-ministri i Jashtëm David Lammy, Peter Kyle, Steve Reed, Richard Hermer, Liz Kendall, Jo Stevens, Hilary Benn dhe Darren Jones.
Burnham u bë zyrtarisht kryeministër pasi u ngarkua nga Mbreti Charles III me formimin e qeverisë, pas dorëheqjes së Keir Starmer. Në fjalimin e tij të parë nga Downing Street, ai premtoi masa të menjëhershme për uljen e kostos së jetesës, decentralizimin e pushtetit dhe një plan 10-vjeçar për rilindjen ekonomike të vendit.
Shabana Konservatore Britanike. Jane perzier keq punet....