FLASH
Shkruar nga Pamfleti
Presidenti rus, Vladimir Putin, ka kërcënuar duke thënë se Moska do të intensifikojë sulmet ndaj Ukrainës, pas një sulmi të paprecedent ukrainas të kryer gjatë fundjavës në qytetin rus të Belgorodit.
Sulmi i së shtunës në Belgorod la të vrarë 24 persona dhe 100 të tjerë u plagosën. Ky sulm erdhi pasi Moska kreu një sulm të shkallës së gjerë ndaj qyteteve ukrainase.
“Ne do të intensifikojmë sulme. Asnjë krim ndaj civilëve nuk do të kalojë pa u ndëshkuar, kjo është e sigurt”, tha Putin të hënën gjatë një vizite në një spital ushtarak.
Ai shtoi se Rusia do të vazhdojë të godasë ato që presidenti rus i quajti “instalacione ushtarake”.
“Ne po e bëjmë këtë sot, do ta bëjmë nesër dhe do të vazhdojmë të veprojmë kështu”, tha Putin, teksa pushtimi i paprovokuar rus i Ukrainës pothuajse ka hyrë në vitin e dytë.
Këto deklarata të Putinit erdhën ditën kur Ukraina raportoi për një “numër rekord” të sulmeve ruse me dronë. Ukraina raportoi për 90 sulme me dronë gjatë natës.
Lideri rus po ashtu tha se beson se “iniciativa strategjike” në konfliktin në Ukrainë është në anën e Rusisë.
“Kështu më kanë informuar”, u shpreh ai.
Putin po ashtu pretendoi se Moska dëshiron t’i japë fund konfktit “sa më shpejt që të jetë e mundur”, por “vetëm sipas kritereve tona”.
Ai theksoi se Ukraina po përdoret nga Perëndimi “që të zgjidhë problemet” që Perëndimi ka me Rusinë./ REL
Lini një Përgjigje