FLASH
Shkruar nga Pamfleti
Shtatë persona kanë humbur jetën në Francë si pasojë e valës së fortë të të nxehtit që po prek një pjesë të madhe të Evropës Perëndimore në fillim të verës. Temperaturat rekord janë regjistruar në Francë dhe Mbretërinë e Bashkuar, ndërsa meteorologët paralajmërojnë rritje të mëtejshme të temperaturave.
Zëdhënësja e qeverisë franceze, Maud Bregeon, deklaroi se viktimat lidhen drejtpërdrejt ose tërthorazi me temperaturat ekstreme, ndërsa pesë prej rasteve kanë ndodhur nga mbytja.
Sipas Meteo France, temperatura më e lartë e regjistruar të hënën ishte 37.1 gradë Celsius pranë Hossegor, në jugperëndim të vendit. Shërbimi meteorologjik paralajmëroi se në disa zona të Francës temperaturat mund të kalojnë 36 gradë Celsius edhe gjatë ditës së martë.
Autoritetet franceze raportuan gjithashtu se e hëna rezultoi dita më e nxehtë e regjistruar ndonjëherë për muajin maj, me temperaturën mesatare kombëtare që arriti në 24.4 gradë Celsius, duke kaluar rekordin e mëparshëm të vitit 1944.
Temperatura rekord u regjistruan edhe në Mbretërinë e Bashkuar. Zyra Meteorologjike britanike bëri të ditur se në Kew Gardens, në jugperëndim të Londrës, temperatura arriti në 34.8 gradë Celsius, niveli më i lartë i matur ndonjëherë për muajin maj.
Në Spanjë, autoritetet meteorologjike paralajmëruan se temperaturat nga 36 deri në 38 gradë Celsius do të vazhdojnë në disa lugina kryesore të vendit, ndërsa në disa zona termometri mund të arrijë deri në 40 gradë Celsius.
Ndërkohë, rajoni i Lazios në Itali, ku përfshihet edhe Roma, ka vendosur kufizime për punën në ferma, kantiere ndërtimi dhe sektorin e shpërndarjes gjatë orëve më të nxehta të ditës.
Qeveria franceze pritet të zhvillojë një mbledhje me ministrat përgjegjës për të vlerësuar masat për përballimin e valës së të nxehtit, pasi qindra stacione meteorologjike në vend regjistruan temperatura rekord për muajin maj.
Parashikuesit e motit paralajmërojnë se temperatura të tjera rekord mund të regjistrohen në Francë, Spanjë dhe Britaninë e Madhe gjatë ditëve në vijim, ndërsa Meteo France e ka cilësuar këtë episod si një valë të nxehti të parakohshme dhe të pazakontë për sezonin.
Lini një Përgjigje