FLASH
Shkruar nga Pamfleti
Ministri iranian i Mbrojtjes, Aziz Nafizardeh ka paralajmëruar SHBA të mërkurën se vendi i tij do të sulmojë bazat amerikane në rajon nëse Donald Trump nisin një ofensivë kundër kombit persian.
"Irani do të sulmojë bazat amerikane nëse sulmohet", tha ministri i mbrojtjes, shkruan La Stampa.
Ai shtoi se të gjitha bazat amerikane dhe bazat ushtarake të vendeve të tjera në rajon që ndihmojnë Shtetet e Bashkuara në sulmet ndaj Iranit, do të konsiderohen objektiva legjitime.
"Përgjigja e Iranit do të jetë e dhimbshme për armiqtë e tij nëse Irani sulmohet”, deklaroi ai.
Presidenti amerikan Donald Trump ka paralajmëruar se Shtetet e Bashkuara do të ndërmarrin “masa shumë të forta” nëse autoritetet iraniane fillojnë ekzekutimin e protestuesve antiqeveritarë të arrestuar gjatë protestave masive që kanë përfshirë vendin javët e fundit. Deklarata u bë në një intervistë për CBS News, në një moment kur numri i të vdekurve nga përplasjet mes forcave të sigurisë dhe protestuesve ka kaluar shifrën 2,500.
“Nëse bëjnë diçka të tillë, ne do të marrim masa shumë të forta”, tha Trump, duke shtuar se është në dijeni të një numri mjaft të madh viktimash nga demonstratat që kanë zgjatur më shumë se dy javë në mbarë Iranin.
Shqetësimi ndërkombëtar është rritur pas raportimeve se një nga protestuesit e arrestuar, 26-vjeçari Erfan Soltani, mund të përballet me ekzekutim të menjëhershëm. Ai u arrestua në qytetin Karaj, në periferinë veriperëndimore të Teheranit, gjatë kulmit të protestave, pak para ndërprerjes së internetit. Organizata Amnesty International ka ngritur alarmin për rastin e tij, duke paralajmëruar se autoritetet iraniane mund të rikthejnë gjyqe të shpejta dhe ekzekutime arbitrare për të shtypur çdo formë kundërshtimi.
Sipas Human Rights Activists News Agency (HRANA), deri herët të mërkurën numri i të vdekurve kishte arritur në të paktën 2,571 persona, përfshirë 12 fëmijë, ndërsa mbi 18,100 njerëz janë arrestuar. Ky bilanc është më i rëndi i dekadave të fundit dhe kujton trazirat e Revolucionit Islamik të vitit 1979. Televizioni shtetëror iranian ka pranuar për herë të parë viktimat, duke cituar një zyrtar që foli për shumë martirë.
Trump, gjatë intervistës, iu referua edhe veprimeve të mëparshme ushtarake të SHBA-së, si goditjet në Venezuelë dhe vrasja e ish-udhëheqësit të ISIS-it, Abu Bakr al-Baghdadi, duke lënë të kuptohet se Uashingtoni nuk do të qëndrojë pasiv. “Ne nuk duam të shohim mijëra njerëz të vriten. Nëse fillojnë të zbatojnë dënime me varje, do të shohim si do t’u shkojë. Nuk do t’u shkojë mirë,” u shpreh ai.
Në rrjetin e tij social Truth Social, Trump publikoi edhe një mesazh të drejtpërdrejtë për protestuesit iranianë, duke i inkurajuar të vazhdojnë protestat dhe duke paralajmëruar se “ndihma është rrugës”. Si reagim, misioni i Iranit në OKB deklaroi se “skenari amerikan do të dështojë sërish”, duke akuzuar SHBA-të për përpjekje për ndryshim regjimi përmes sanksioneve dhe presionit politik.
Ndërkohë, Rusia ka kritikuar presionin amerikan ndaj Iranit, duke thënë se forca të jashtme po përpiqen të shfrytëzojnë tensionet e brendshme për të destabilizuar shtetin iranian. Autoritetet iraniane këmbëngulin se situata është vënë nën kontroll, megjithëse prania e forcave të sigurisë në rrugë mbetet e lartë dhe raportime të shumta flasin për konfiskime të pajisjeve satelitore dhe rrëfime të detyruara të transmetuara në mediat shtetërore.
Situata në Iran mbetet e tensionuar, ndërsa komuniteti ndërkombëtar ndjek me shqetësim zhvillimet dhe rrezikun e një përshkallëzimi të mëtejshëm të dhunës.
Lini një Përgjigje