FLASH
Shkruar nga Simone McCarthy
Vizita e Donald Trump në Pekin është parë si një fitore simbolike për presidentin kinez Xi Jinping, i cili prej kohësh synon që Kina të perceptohet si një fuqi globale e barabartë me Shtetet e Bashkuara.
Sipas analizës, ceremonia luksoze e organizuar nga Pekini për pritjen e Trumpit nuk ishte vetëm një spektakël diplomatik për presidentin amerikan, por edhe një mesazh i qartë politik nga Kina për botën.
Në qendër të kësaj strategjie ishte imazhi i Kinës si një superfuqi që trajtohet në të njëjtin nivel me SHBA-në.
Trump u prit me ceremoni shtetërore në Sallën e Madhe të Popullit, ndërsa në sfond qëndronin disa nga emrat më të fuqishëm të biznesit amerikan, përfshirë Elon Musk të Teslës dhe Tim Cook të Apple.
Pamjet u interpretuan si një demonstrim force nga Pekini, duke treguar se edhe kompanitë më të mëdha amerikane mbeten të lidhura ngushtë me tregun kinez dhe varen prej tij për suksesin e tyre.
“Kemi ardhur për t’ju shprehur respekt juve dhe Kinës”, i tha Trump Xi Jinping gjatë takimit në Pekin.
Presidenti amerikan e cilësoi gjithashtu liderin kinez si një “udhëheqës të madh”, deklaratë që u pa si një tjetër sinjal i rëndësishëm politik dhe diplomatik.
Për Xi Jinping, këto deklarata dhe simbolika kanë rëndësi të madhe jo vetëm për politikën e jashtme, por edhe për audiencën brenda Kinës, ku Pekini po përpiqet të forcojë narrativën se vendi është një lider global në ngjitje.
“Kina është një lojtare kyçe në skenën globale dhe një lidere alternative ndaj një SHBA-je në rënie”, thuhet në analizën për "CNN".
Sipas analizës, Kina po punon gjithnjë e më shumë për të projektuar veten si një alternativë ndaj një Amerike që perceptohet në rënie, duke synuar të zërë një rol më dominant në skenën ndërkombëtare.
Lini një Përgjigje