FLASH
Shkruar nga Nette Nöstlinger
Kundërshtarët e “Alternativa për Gjermaninë” e akuzojnë partinë se po përpiqet të zbulojë informacione të ndjeshme mbi rrugët e furnizimit me armë dhe mbrojtjen nga dronë…
Politikani gjerman i ekstremit të djathtë, Ringo Mühlmann, ka treguar një interes të veçantë në ekspozimin e informacionit që kundërshtarët e tij politikë thonë se mund të jetë me interes të madh për inteligjencën ruse.
Duke përdorur të drejtat që i janë dhënë si ligjvënës për Alternativën për Gjermaninë (AfD) në parlamentin e shtetit lindor të Turingisë, ku AfD është partia më e forte, Mühlmann i ka kërkuar vazhdimisht Qeverisë rajonale të zbulojë detaje të ndërlikuara mbi tema të tilla si mbrojtja lokale nga dronë dhe transportet perëndimore të armëve në Ukrainë.
“Çfarë informacioni ka Qeveria e shtetit në lidhje me shkallën e transporteve ushtarake tranzitore përmes Turingisë që nga viti 2022 (të ndara sipas vitit, llojit të transportit [rrugor, hekurudhor], numrit të tranziteve dhe ndalesave të njohura)?”, pyeti Mühlmann me shkrim në shtator .
Një ditë në qershor, Mühlmann, i cili mohon se po i bindet urdhrave të Rusisë, ngriti 8 kërkesa në lidhje me dronët dhe aftësitë mbrojtëse të policisë së rajonit nga dronë, e cila është përgjegjëse për zbulimin dhe parandalimin e dronëve që konsiderohen kërcënim spiunazhi.
“Cilat sisteme teknike për mbrojtjen nga dronë janë të njohura për policinë e Turingisë (p.sh., bllokues, lëshues rrjetash, pajisje me pulse elektromagnetike) dhe deri në ç'masë janë testuar këto për përdorshmërinë e tyre në zbatimin e ligjit?”, pyeti Mühlmann .
Pyetje të tilla nga ligjvënësit e AfD-së në parlamentet shtetërore dhe federale i kanë shtyrë centristët gjermanë të akuzojnë ligjvënësit e partisë së ekstremit të djathtë se përdorin pozicionet e tyre për të zbuluar informacione të ndjeshme që Moska mund të përdorë në luftën e saj kundër Ukrainës dhe për të ndihmuar në kryerjen e të ashtuquajturës “luftë hibride” kundër Evropës.
“Nuk mund të mos krijohet përshtypja se AfD po punon sipas një liste detyrash që i janë caktuar nga Kremlini”, tha për gazetën gjermane “Handelsblatt”, ministri i Brendshëm i Turingisë, Georg Maier, një anëtar i Partisë Socialdemokrate (SPD) të qendrës së majtë .
Në vijim ai shprehet: “ajo që më bëri përshtypje ishte një interes i jashtëzakonshëm për infrastrukturën kritike dhe autoritetet e sigurisë këtu në Turingi, veçanërisht mënyra se si ata merren me kërcënimet hibride”.
“Papritmas, çështjet gjeopolitike po luajnë një rol në pyetjet e tyre, ndërsa ne në Parlamentin e shtetit të Turingisë nuk jemi përgjegjës për politikën e jashtme apo politikën e mbrojtjes”, tha zyrtari gjerman.
Insinuata 'të pabesisë'
Udhëheqësit e AfD-së shpesh marrin qëndrime të favorshme për Kremlinin, duke favorizuar një ripërtëritje të lidhjeve ekonomike dhe importeve të gazit dhe një ndërprerje të ndihmës për furnizimin me armë të Ukrainës. Megjithatë, kundërshtarët e tyre politikë i kanë akuzuar shpesh se veprojnë jo vetëm me bindje, por me urdhër të Moskës. Ligjvënësja e të Gjelbërve, Irene Mihalic, për shembull, muajin e kaluar e quajti partinë "kalin e Trojës" të Presidentit rus Vladimir Putin në Gjermani.
Politikanët e AfD-së mohojnë akuzat se po përdorin pushtetin e tyre parlamentar në rritje si në nivel kombëtar ashtu edhe në shtetet e Gjermanisë, për t'i kaluar Kremlinit informacione të ndjeshme.
Tino Chrupalla, një nga udhëheqësit kombëtarë të AfD-së, kundërshtoi fuqishëm akuzat se partia e tij po përpiqet të zbulojë rrugët e furnizimit me armë në dobi të Kremlinit.
“Qytetarët kanë frikë të ligjshme për atë që shohin dhe përjetojnë në autostrada çdo mbrëmje”, tha ai në një emision televiziv muajin e kaluar kur u pyet për pyetjet e Mühlmann, duke shtuar se “këto janë të gjitha pyetje të ligjshme nga një anëtar i parlamentit që është i shqetësuar dhe që i merr seriozisht shqetësimet dhe nevojat e qytetarëve. Po bëni aludime, gjë që është mjaft e pabesë; po na akuzoni për gjëra që nuk mund t’i provoni kurrë”.
Mühlmann, një ish-oficer policie, duke folur për Politico, mohoi se po ndjek një listë detyrash "në drejtim të Rusisë".
Ministrat e Qeverisë, ndërsa janë të detyruar t'i përgjigjen çdo hetimi parlamentar, nuk janë të detyruar të zbulojnë informacione të ndjeshme ose të klasifikuara që mund të rrezikojnë sigurinë kombëtare, argumentoi gjithashtu Mühlmann.
“Nuk më takon mua të kufizoj pyetjet, por ministri mund të kufizohet me përgjigje”, tha ai, duke shtuar se “nëse në një moment një përgjigje e tillë përbën rrezik ose çon në spiunazh, atëherë spiunazhi nuk është faji im, por i ministrit, sepse ai ka zbuluar informacione që nuk duhej t’i kishte zbuluar”.
Fluks pyetjesh parlamentare
Marc Henrichmann, një ligjvënës konservator dhe kryetar i një komisioni të posaçëm në Bundestagun e Gjermanisë që mbikëqyr shërbimet e inteligjencës së vendit, tha se ndërsa qeveria nuk është e detyruar të zbulojë informacione të klasifikuara ose shumë të ndjeshme në përgjigjet e saj ndaj pyetjeve parlamentare, shërbimet e inteligjencës ruse ende mund të mbledhin njohuri të vlefshme nga vëllimi dhe shumëllojshmëria e pyetjeve të AfD-së.
“Përveç pyetjeve të parëndësishme dhe pyetjeve të ndjeshme, ekziston edhe një zonë e madhe gri”, tha Henrichmann, duke shtuar se “dhe ajo që kam dëgjuar rregullisht nga ministri të ndryshme është se pyetjet individuale nuk janë realisht problemi. Por kur i shikoni këto pyetje individuale krah për krah, merrni një pamje, për shembull, të rrugëve të udhëtimit, furnizimeve me ndihmë dhe mallrave ushtarake për në ose në drejtim të Ukrainës”.
Henrichmann tha se pyetjet parlamentare të AfD-së në Bundestag mbi tema të tilla si njohuritë e autoriteteve për sabotimin rus dhe aktivitetet hibride në rajonin e Detit Baltik, si dhe për helmimin e udhëheqësit të ndjerë të opozitës ruse Alexei Navalny, i kishin tërhequr vëmendjen dhe kishin ngritur shqetësime.
Fraksionet e AfD-së në parlamentet e shteteve gjermane kanë paraqitur më shumë se 7000 kërkesa në lidhje me sigurinë që nga fillimi i vitit 2020, sipas një analize të të dhënave nga Spiegel, më shumë se çdo parti tjetër dhe rreth një e treta e të gjitha kërkesave të lidhura me sigurinë së bashku.
Në Tyringi, ku autoritetet shtetërore të inteligjencës e kanë etiketuar AfD-në si një grup ekstremist, partia ka paraqitur gati 70 përqind (1,206 nga 1,738) të të gjitha pyetjeve të paraqitura këtë periudhë legjislative. Në Bundestag, pyetjet parlamentare të partive përbëjnë më shumë se 60 përqind të të gjitha pyetjeve (636 nga 1,052).
Përdorimi strategjik i pyetjeve parlamentare nga AfD nuk është asgjë e re, thonë ekspertët. Që nga hyrja në Bundestag në vitin 2017, partia i ka dërguar ato në Ministritë përkatëse dhe për të mbledhur informacione mbi kundërshtarët e perceptuar politikë, thonë ekspertët.
“Që nga fillimi, AfD ka përdorur pyetjet parlamentare për të penguar, paralizuar dhe gjithashtu për të monitoruar armiqtë politikë”, tha Anna-Sophie Heinze, një studiuese në Universitetin e Trierit.
Lidhur me morinë e pyetjeve që lidhen me sigurinë kombëtare, arseyeja se çfarë po e nxit AfD-në është kryesisht e parëndësishme, tha Jakub Ëondreys, një studiues në Institutin Hannah Arendt për Studime Totalitarizmi në Universitetin Teknik të Dresdenit, i cili studion politikën e AfD-së ndaj Rusisë.
"Nuk është e pamundur që ata të veprojnë në emër të Kremlinit. Është gjithashtu e mundur që ata të veprojnë në emër të vetes, sepse, sigurisht, ata janë pro-Kremlinit. Por rezultati përfundimtar është pothuajse i njëjtë. Këto pyetje janë një kërcënim potencial për sigurinë kombëtare", shtoi ai. /Përshtatur nga Politico/
Lini një Përgjigje