FLASH
Shkruar nga Pamfleti
Trump sinjale pozitive mbi negociatat me Ukrainën...
Presidenti i Shteteve të Bashkuara, Donald Trump, ka sinjalizuar se paqja në Ukrainë është më afër se kurrë.
Ai ka njoftuar në rrjetet sociale se administrata e tij ka bërë “përparim të jashtëzakonshëm” gjatë javës së fundit në përpjekjet për t’i dhënë fund luftës mes Rusisë dhe Ukrainës. Në një deklaratë publike, Trump tha se palët kanë afruar qëndrimet mbi planin e paqes, i cili është reduktuar tashmë në “vetëm disa pika të mbetura pezull”.
Sipas presidentit amerikan, plani origjinal me 28 pika, i hartuar nga SHBA, është rishikuar me kontribute shtesë nga Moska dhe Kievi. Trump tha se muajin e kaluar “25 mijë ushtarë humbën jetën” dhe se situata kërkon një marrëveshje urgjente.
Me synimin për të finalizuar planin, Trump njoftoi se emisari i tij special, Steve Ëitkoff, është dërguar në Moskë për t’u takuar me presidentin rus Vladimir Putin. Paralelisht, sekretari i Ushtrisë, Dan Driscoll, do të zhvillojë bisedime me përfaqësuesit e Ukrainës.
Trump theksoi se do të informohet rregullisht mbi ecurinë e negociatave, së bashku me zëvendëspresidentin JD Vance, sekretarin e Shtetit Marco Rubio, sekretarin e Luftës Pete Hegseth dhe shefen e stafit të Shtëpisë së Bardhë, Susie Ëiles.
Presidenti amerikan u shpreh i gatshëm të takohet me Volodymyr Zelensky dhe Vladimir Putin “vetëm kur marrëveshja të jetë gati për t’u finalizuar ose në fazën përfundimtare”. Ai u bëri thirrje të gjitha palëve të ruajnë përkushtimin, duke shtuar se shpreson që “paqja të arrihet sa më shpejt të jetë e mundur”.
Procesi i ndërmjetësuar nga SHBA duket të ketë hyrë në një fazë vendimtare, ndërsa komuniteti ndërkombëtar pret reagimin e Moskës dhe gatishmërinë e dy palëve për të nënshkruar një marrëveshje që mund t’i japë fund konfliktit më të rëndë në Evropë që prej Luftës së Dytë Botërore.
“Gjatë javës së kaluar, ekipi im ka bërë përparime të jashtëzakonshme lidhur me përpjekjet për t’i dhënë fund luftës mes Rusisë dhe Ukrainës (një luftë që NUK do të kishte nisur kurrë nëse unë do të isha President!). Muajin e kaluar humbën jetën 25.000 ushtarë. Plani fillestar i Paqes me 28 pika, i cili u hartua nga Shtetet e Bashkuara, është përmirësuar, duke përfshirë sugjerime shtesë nga të dyja palët, dhe tani kanë mbetur vetëm disa çështje të pazgjidhura.
Me shpresën për të finalizuar këtë Plan Paqeje, kam udhëzuar të dërguarin tim special, Steve Witkoff, të takohet me Presidentin Putin në Moskë dhe, në të njëjtën kohë, Sekretari i Ushtrisë Dan Driscoll do të takohet me ukrainasit. Unë do të informohem mbi çdo përparim të bërë, së bashku me Zëvendëspresidentin JD Vance, Sekretarin e Shtetit Marco Rubio, Sekretarin e Luftës Pete Hegseth dhe Shefen e Stafit të Shtëpisë së Bardhë, Susie Wiles.
Me padurim pres të kem mundësinë të takohem së shpejti me Presidentin Zelensky dhe Presidentin Putin, por vetëm kur marrëveshja për t’i dhënë fund kësaj lufte të jetë FINALE ose në fazat e fundit të saj.
Faleminderit për vëmendjen ndaj këtij çështjeje jashtëzakonisht të rëndësishme, dhe le të shpresojmë të gjithë që PAQJA të arrihet sa më shpejt të jetë e mundur”, shkruan ai. /Pamfleti
Lini një Përgjigje