FLASH
Shkruar nga Pamfleti
Nga Comey te Epstein: Bondi shmang pyetjet, sulmon senatorët
Seanca e sotme në Komitetin Gjyqësor të Senatit me pjesëmarrjen e Prokurores së Përgjithshme Pam Bondi nxori në pah përçarjen e thellë politike mbi mënyrën se si po funksionon drejtësia në Shtetet e Bashkuara.
Demokratët e akuzuan Bondin se ka lejuar ndërhyrjen e drejtpërdrejtë të ish-Presidentit Trump në vendimmarrjet penale të Departamentit të Drejtësisë, duke përfshirë edhe aktakuzën ndaj ish-drejtorit të FBI-së, James Comey. Nga ana tjetër, republikanët kthyen gishtin nga administrata e mëparshme Biden, duke e akuzuar për përdorim të Jack Smith si prokuror special për të ndjekur Trump-in dhe për spiunim ndaj senatorëve republikanë.
Strategjia e Bondit: shmang dhe sulmo
Pam Bondi shmangu pyetjet lidhur me çështjet më të nxehta si: hetimi për Jeffrey Epstein, dërgimi i Gardës Kombëtare në shtetet demokrate dhe pushimet nga puna në DOJ. Në vend të përgjigjeve të qarta, përdori fjali të shkurtra, sulme personale dhe kundërsulme ndaj demokratëve.
Kur u pyet për lidhjet e Trump me Epstein, Bondi përmendi demokratë që kishin lidhje me Reid Hoffman, një tjetër figurë e diskutuar. Në debat me senatori Dick Durbin, ajo shpërtheu: “Do të doja ta doje Çikagon aq sa e urren Trump-in.”
Ajo sulmoi edhe senatorin Richard Blumenthal, duke e akuzuar për gënjeshtra rreth shërbimit të tij në Vietnam: “Senator, si guxon të vësh në pikëpyetje integritetin tim kur ke gënjyer për shërbimin ushtarak?”.
Kur Sen. Mazie Hirono ngriti pyetje për mbylljen e një hetimi mbi Tom Homan dhe një pagesë të dyshuar prej 50,000 dollarësh, Bondi u shmang me një kundërpyetje për pjesëmarrjen e Hirono-s në një protestë pranë anëtarëve të ANTIFA-s.
Debati për ndikimin e Trump-it në drejtësi
Demokratët paraqitën shembuj të ndryshëm që, sipas tyre, provojnë ndikimin e drejtpërdrejtë të Trump-it mbi Bondin. Ata i referuan një postimi në rrjete sociale ku Trump e urdhëronte publikisht Bondin të niste ndjekje penale ndaj tre kundërshtarëve të tij politikë. Vetëm disa ditë më pas, James Comey u akuzua.
Senatorja Klobuchar e pyeti nëse e konsideronte këtë një urdhër të drejtpërdrejtë për DOJ-in. Bondi tha: “Trump është presidenti më transparent në historinë amerikane. Nuk tha asgjë që nuk e ka thënë më parë.”
Një foto e shfaqur nga Blumenthal, ku Bondi shfaqej në darkë në Shtëpinë e Bardhë me Trump natën para aktakuzës ndaj Comey, ndezi debat. Bondi mohoi të ketë diskutuar ndonjë çështje me presidentin dhe refuzoi të japë detaje për bisedën.
Po ashtu, ajo nuk komentoi për shkarkimet masive të zyrtarëve të DOJ, përfshirë ata që punonin në hetimet për 6 janarin ose që refuzonin të ndjekin çështje të kërkuara nga Trump.
Seanca e sotme e konfirmoi se drejtësia në SHBA po bëhet terreni kryesor i betejës politike. Demokratët kërkuan transparencë dhe pavarësi nga Bondi, ndërsa republikanët e përdorën dëshminë për të kthyer akuzat ndaj administratës së mëparshme. Në fund, Bondi nuk dha shumë përgjigje konkrete – por u tregua luftëtare politike. /Pamfleti
Lini një Përgjigje