FLASH
Shkruar nga Pamfleti
Perëndimi po i kupton shumë ngadalë kërcënimet ndaj vetes.
“Përveç luftës në Ukrainë, Rusia po zhvillon një luftë hibride kundër Perëndimit dhe synimi i saj është të shkatërrojë Bashkimin Evropian dhe NATO-n”, kështu deklaron profesori dhe studiuesi ukrainas, Ihor Todorov.
Todorov shprehet se situata në Ukrainë nuk është aspak e mirë, teksa thekson se edhe diskutimet për një marrëveshje janë të zymta pasi kushtet e Moskës kërkojnë copëtimin e Ukrainës. Ai theksoi se ndihma e perëndimit është ajo që mban gjallë shpresën, por shtoi se nuk është e mjaftueshme pasi shumë prej vendeve të BE-së janë skeptikë për rezultatin.
“Fatkeqësisht, situata nuk është e mirë. Lufta në shkallë të gjerë vazhdon prej dy vitesh e gjysmë... Ata mendojnë se Ukraina nuk mund të ekzistojë. Për ta, Ukraina është një pjesë e Rusisë që duhet të jetë vetëm pjesë e perandorisë. Dhe politikanët modernë rusë, oficerët ushtarakë, ata studiuan nga libri i gjeopolitikës i Aleksandr Dugin shkencëtar politik dhe propagandist rus. Në vitin 1996, aty shkruhej se ekzistenca e Ukrainës është e barabartë me pushtimin e Rusisë. Dhe, për fat të keq, rusët ia dolën të pushtojnë rajonin tim të lindjes Donetsk.
Pra, ka disa deklarata optimiste nga politikanët tanë, politikanë ukrainas dhe perëndimorë, se lufta duhet të përfundojë, se do të ketë një lloj bisede paqeje. Por, për fat të keq, negociatat për çfarë? Në Rusi, Kushtetuta thotë se rajoni i Donetskut është pjesë e Rusisë. Dhe ata, të paktën tani, nuk do të pranojnë ta refuzojnë atë. Pra, për fat të keq, nuk jam optimist për momentin, sepse ka shumë faktorë. Dhe Ukraina, duke folur objektivisht, është shumë e varur nga ndihma perëndimore. Dhe kjo ndihmë ekziston, por nuk është e mjaftueshme. Dhe për mendimin tim, vetëm kuptimi i Perëndimit se kjo nuk është vetëm lufta jonë, por edhe lufta e tyre, do të mund të ndryshojë situatën. Por nuk ka një ndërgjegjësim të tillë”, tha ai në një intervistë për “TheGeopost”.
Më tej, profesori Todorov flet dhe për infiltrimin e thellë të propagandës ruse në perëndim dhe më gjerë. Sipas tij, qëllimi kryesor i propagandës ruse mbetet t'i japë përfundimisht Ukrainën, Rusisë. Megjithatë ai paralajmëron se një gjë e tillë do të jetë fatkeqësi për Perëndimin.
“Për shembull, propaganda ruse, e cila vepron shumë hapur në vendet perëndimore, synon të bëjë opinionin publik në këto vende jo në favor të Ukrainës, kundër Ukrainës: 'le t'ia japim Ukrainën Rusisë'. Dhe teorikisht, kjo është e mundur, por Perëndimi duhet të kuptojë se kjo do të jetë një fatkeqësi edhe për të. Sepse Rusia po bën një luftë, një luftë të nxehtë kundër Ukrainës, por prej shumë vitesh po bën edhe një luftë hibride kundër Perëndimit”, u shpreh Todorov.
Më tej ai theksoi se qëllimi kryesor i propagandës ruse është të arrijë përtej Ukrainës dhe të shkatërrojë BE-në dhe NATO-n. Todorov argumenton se Moska po e arrin këtë nëpërmjet preferencave elektorale në vendet e BE-së, ku shumë parti ekstremiste po shohin një rritje të madhe. Ndër rastet më të pikasura ai liston, AfD-në gjermane dhe partitë qeverisëse në Sllovaki dhe Hungari.
“Dhe qëllimi i Rusisë është shkatërrimi i Bashkimit Evropian, shkatërrimi i NATO-s. Dhe preferencat elektorale në vendet evropiane tregojnë se veprime të tilla kanë njëfarë suksesi. Për shembull, këto janë zgjedhjet e fundit në Austri, si dhe ato shtetërore në Gjermani, ku fitoi Alternativa për Gjermaninë – AfD. Nuk po flas për Sllovakinë, nuk po flas për Hungarinë. Unë kam jetuar në Zakarpattia, në Uzhhorod, vitet e fundit dhe e di mirë këtë situatë”, tha ai.
Todorov shtoi se në vende si Hungaria dhe Sllovaki influenca ruse tashmë ka kapur shtetin. Ai thekson se në këto vende të BE-së dhe NATO-s, nuk ka nevojë as për prezencë të mediave ruse, pasi ato vendase ndajnë të njëjtin qëndrim se mediat e Moskës.
“Nuk ka kanale ruse të hapura në Hungari, as që kanë nevojë. Mediat e tyre zyrtare funksionojnë në të njëjtin kontekst si ato ruse. Dhe ky është një vend i Bashkimit Evropian, një vend i NATO-s. Dhe gjithashtu ka të drejtën e Vetos për të marrë vendime për Ukrainën. Ata ndihmuan në mënyrë aktive nga shkurti ose marsi 2022, por siç e ka pranuar tashmë ish Sekretari i Përgjithshëm i NATO-s, Jens Stoltenberg, NATO nuk bëri atë që ishte e nevojshme për të parandaluar fillimin e luftës. Kjo do të thotë, në teori, Ukraina mund të ishte ftuar për t'u bashkuar me NATO-n në janar 2022. Dhe pavarësisht nga të gjitha marrëzitë e udhëheqjes ruse, ata kanë frikë të luftojnë me NATO-n. Edhe pse propaganda e tyre thotë: “Ne jemi në luftë me NATO-n, me Amerikën, e kështu me radhë”, por në realitet nuk janë”, u shpreh Todorov.
Sipas profesorit ukrainas, Perëdnimi është shumë i ngadaltë në të kuptuarit kërcënimet që mund t’i kanosen në të ardhmen. Më tej ai thekson se neglizhenca e BE-së ndaj luftës në Ukrainë do tÇi kthehet shumë shpejtë në Boomerang.
“Sepse Perëndimi po i kupton shumë ngadalë kërcënimet ndaj vetes. Për ta, për shumicën, kjo luftë është diku në lindje të Evropës: 'Po, është mirë që ukrainasit po mbrojnë interesat e tyre, duke mbrojtur kufijtë e Bashkimit Evropian dhe NATO-s. Por kjo nuk është lufta jonë”. 'Ne do të ndihmojmë, siç tha Joe Biden, aq sa është e nevojshme'. Mirë, por sa duhet? Dhe për çfarë qëllimi? Vetëm javën e kaluar, Biden tha se do të ishte deri në fitoren e Ukrainës. Ky është termi "Fitorja e Ukrainës". Por këto janë ende vetëm fjalë. Ne kërkojmë që të mund të qëllojmë në aeroportet ruse, në avionët rusë brenda Rusisë. Por na thuhet se kjo do të ishte një përshkallëzim.
Për çfarë lloj përshkallëzimi kanë nevojë të gjithë? Çdo ditë ka sulme në qytetet e Ukrainës, çdo ditë vdesin civilë, çdo ditë vdesin ushtarakët”, përfundoi ai./Përshtati "Pamfleti" nga "TheGeopost"
Lini një Përgjigje