FLASH
Shkruar nga Pamfleti
Donald Trump kishte përmendur një “shkëmbim territoresh” të mundshëm midis Ukrainës dhe Rusisë si pjesë e një marrëveshjeje të ardhshme midis dy vendeve ndërluftuese, pa sqaruar se sa larg kanë përparuar negociatat...
"Takimi i shumëpritur midis meje, Presidentit të Shteteve të Bashkuara të Amerikës, dhe Presidentit të Rusisë, Vladimir Putin, do të zhvillohet të premten e ardhshme, më 15 gusht 2025, në shtetin e madh të Alaskës", njoftoi Donald Trump nëpërmjet Truth Social.
Gjithashtu, Kremlini ka konfirmuar se samiti midis Presidentit të SHBA-së Donald Trump dhe Presidentit rus Vladimir Putin do të zhvillohet të premten, më 15 gusht, në Alaska, një zgjedhje që Kreu i Shtëpisë së Bardhë, e përshkroi si "mjaft logjike", sipas agjencisë shtetërore ruse të lajmeve TASS, e cila citoi Yuri Ushakov, një ndihmës të presidentit rus.
Kremlini njoftoi gjithashtu se e kishte ftuar Presidentin e SHBA-së Trump të vizitonte Rusinë pas samitit në Alaska.
Këshilltari i Putinit për politikën e jashtme, Yuri Ushakov, tha se nëse do të kishte një takim tjetër midis dy presidentëve pas takimit në Alaska, ai ka të ngjarë të zhvillohet në Rusi.
Ky do të ishte takimi i parë ballë për ballë midis një presidenti amerikan në detyrë dhe Putinit që nga vera e vitit 2021.
Donald Trump kishte përmendur një “shkëmbim territoresh” të mundshëm midis Ukrainës dhe Rusisë si pjesë e një marrëveshjeje të ardhshme midis dy vendeve ndërluftuese, pa sqaruar se sa larg kanë përparuar negociatat.
"Do të ketë një shkëmbim territoresh në dobi të të dyjave, por do të flasim për këtë më vonë", tha presidenti amerikan në Shtëpinë e Bardhë, duke shtuar se çështja "është e ndërlikuar, nuk është vërtet e lehtë". "Po flasim për një zonë ku luftimet kanë vazhduar për tre vjet e gjysmë, një pjesë e së cilës do të rikuperohet", tha ai, duke shmangur të jetë më specifik.
Zyrtarët amerikanë, përfshirë Trumpin, kanë informuar udhëheqësit evropianë dhe zyrtarët ukrainas rreth një plani të ofruar nga Putini për t’i dhënë fund luftës në Ukrainë.
Sipas planit që Putini ia paraqiti të dërguarit të politikës së jashtme të Trumpit, Steve Ëitkoff, në një takim në Moskë të mërkurën, Rusia kërkon që Ukraina të lëshonte rajonin lindor të Donbasit, pjesa më e madhe e të cilit është aktualisht nën pushtimin rus, si dhe Krimenë, të cilën Rusia e aneksoi në mënyrë të paligjshme në vitin 2014.
Trump, i cili kishte pranuar zhgënjimin e tij me presidentin rus në muajt e fundit për shkak të përshpejtimit të konfliktit, dukej më optimist për perspektivën e një marrëveshjeje paqeje të premten. Dhe ai sugjeroi që fokusi i tij kryesor ishte negociimi i një fundi të armiqësive sa më shpejt të jetë e mundur.
“Udhëheqësit evropianë duan të shohin paqe”, u tha Trump gazetarëve në Shtëpinë e Bardhë. “Mendoj se Presidenti Putin dëshiron të shohë paqe dhe Zelensky dëshiron të shohë paqe”.
Ai më vonë shtoi: “Instinkti im më thotë vërtet se kemi një shans për” paqe.
Mbetet e paqartë nëse do të zhvillohet një takim midis Putinit dhe Volodymyr Zelensky-t. Ukrainasi ka bërë vazhdimisht thirrje për një diskutim të tillë. Trump gjithashtu theksoi nevojën për bisedime të drejtpërdrejta midis Moskës dhe Kievit në nivelin më të lartë, duke thënë së fundmi se ato nuk janë një parakusht për takimin e tij personal me Putinin.
Shefi i Kremlinit ka qenë mjaft i rezervuar në lidhje me një samit të mundshëm trepalësh. Ndërsa e konsideron një takim të tillë të mundshëm, kushtet për të janë ende shumë larg, deklaroi ai së fundmi./Përshtatur nga Pamfleti/
Lini një Përgjigje