FLASH
Shkruar nga Pamfleti
Katari ka njoftuar rihapjen e pjesshme të hapësirës së tij ajrore për herë të parë që nga shpërthimi i luftës një javë më parë, duke lejuar vetëm një numër të kufizuar fluturimesh.
Autoriteti i Aviacionit Civil bëri të ditur se hapësira ajrore do të përdoret ekskluzivisht për fluturime evakuimi dhe për transport thelbësor mallrash. Vendimi lidhet me shqetësimet për sigurinë në rajon dhe rrezikun e mundshëm nga sulmet ajrore.
Ndërkohë, Aeroporti Ndërkombëtar Hamad në Doha theksoi se çdo autorizim për fluturime të reja në ditët në vijim do të varet nga vlerësimi i vazhdueshëm i situatës së sigurisë.
Kompania Qatar Airëays ka nisur gjithashtu disa fluturime të kufizuara riatdhesimi drejt qyteteve evropiane, përfshirë Londrën, Romën, Parisin, Madridin dhe Frankfurtin.
Më herët gjatë javës, zyrtarët e Katarit deklaruan se ushtria kishte penguar tentativa të dyshuara për sulme iraniane ndaj aeroportit. Sipas Ministrisë së Mbrojtjes, vetëm të premten u interceptuan nëntë dronë që dyshohet se kishin në shënjestër territorin e vendit.
Autoritetet paralajmërojnë se situata mbetet e paqëndrueshme dhe se çdo vendim për zgjerimin e fluturimeve do të merret në varësi të zhvillimeve të sigurisë në rajon.
Lini një Përgjigje