FLASH
Shkruar nga Pamfleti
Sekretari amerikan i Mbrojtjes, Pete Hegseth, deklaroi se Pentagoni ka përgatitur plane për çdo zhvillim të mundshëm të konfliktit me Iranin, duke përfshirë si përshkallëzimin e operacioneve ushtarake, ashtu edhe tërheqjen apo riorganizimin e forcave amerikane në rajon.
Deklaratat u bënë gjatë një seance dëgjimore në Kongres, ku Hegseth u përball me pyetje të shumta nga ligjvënës demokratë dhe republikanë lidhur me luftën në Iran, kostot e saj dhe strategjinë afatgjatë të administratës Trump.
“Kemi një plan për të përshkallëzuar situatën nëse është e nevojshme. Kemi një plan për të bërë prapa nëse është e nevojshme. Kemi një plan për të zhvendosur asetet”, tha Hegseth para nënkomitetit të Kongresit.
Megjithatë, ai shmangu dhënien e detajeve konkrete për hapat e ardhshëm ushtarakë, duke argumentuar se situata mbetet tepër sensitive dhe lidhet drejtpërdrejt me objektivin e presidentit Donald Trump për të penguar Iranin të zhvillojë armë bërthamore.
Komentet e shefit të Pentagonit vijnë në një moment tensionesh të larta në Lindjen e Mesme, ndërsa Irani vijon të ushtrojë presion përmes Ngushticës së Hormuzit, një korridor strategjik ku kalon rreth 20% e naftës botërore. Sipas raportimeve, Teherani ka kufizuar lëvizjen detare në zonë, duke rritur shqetësimet për ndikimin në tregjet globale të energjisë.
Hegseth deklaroi gjithashtu se armëpushimi me Iranin “mbetet në fuqi”, pavarësisht incidenteve të fundit në Gjirin Persik dhe pretendimeve për sulme iraniane ndaj anijeve amerikane.
“Armëpushimi do të thotë që zjarri po pushon dhe ne e dimë se kjo ka ndodhur ndërsa zhvillohen negociatat”, u shpreh ai.
Në dëshminë e tij, Hegseth mbrojti edhe kërkesën e administratës Trump për një buxhet ushtarak prej 1.5 trilionë dollarësh, të cilin e cilësoi si “historik” dhe të domosdoshëm për forcimin e kapaciteteve ushtarake amerikane.
Sipas tij, fondet do të përdoren për modernizimin e ushtrisë, rritjen e pagave të trupave, përmirësimin e infrastrukturës ushtarake dhe zgjerimin e projekteve strategjike të mbrojtjes.
Ndërkohë, Pentagoni pranoi se kostoja e operacioneve ushtarake kundër Iranit ka arritur në rreth 29 miliardë dollarë, një shifër më e lartë se vlerësimet e mëparshme për shkak të shpenzimeve operative dhe zëvendësimit të pajisjeve ushtarake.
Hegseth reagoi edhe ndaj kritikave për mungesën e municioneve dhe raketave pas operacioneve në rajon, duke insistuar se rezervat amerikane mbeten të mjaftueshme.
“Çështja e municioneve është ekzagjeruar në mënyrë të panevojshme. Ne e dimë saktësisht çfarë kemi dhe kemi me bollëk atë që na nevojitet”, deklaroi ai.
Lini një Përgjigje