FLASH
Shkruar nga Pamfleti
Me gjuhë agresive dhe kërcënime politike, Donald Trump rikthehet në skenë duke e shpallur Zohran Mamdanin armik të vlerave amerikane; një betejë që zbulon fytyrën autoritare të populizmit modern amerikan...
Pas fitores së Mamdanit në primaret e demokratëve për Bashkinë e Nju Jorkut, Trump e ka etiketuar “komunist të çmendur”, ka kërcënuar se do t’i ndërpresë fondet federale qytetit dhe ka sulmuar pamjen e tij, zërin dhe prejardhjen. Përplasja tregon polarizimin ekstrem të politikës amerikane dhe kthimin e luftës ideologjike në mjet elektoral.
Donald Trump e ka kthyer garën për kryebashkiakun e Nju Jorkut në një arenë personale pushteti dhe ideologjie. Pas fitores së Zohran Mamdanit në primaret e demokratëve, ish-presidenti shpërtheu publikisht në rrjetet e tij sociale, duke e quajtur “100 % komunist, i çmendur dhe i rrezikshëm për Amerikën”.
Më tej, ai paralajmëroi se nëse Mamdani zgjidhet, do të pezullojë fondet federale për qytetin, një kërcënim që ngre pikëpyetje serioze mbi respektin e Trumpit për autonominë lokale dhe normat demokratike.
Sulmet nuk ndalën te ideologjia. Trump e përqeshi pamjen dhe zërin e Mamdanit, duke u ndalur madje te origjina e tij, një imigrant me rrënjë ugande, qytetar amerikan që nga viti 2018. Kjo lloj retorike nuk është e re për Trumpin, por rishfaqet me intensitet të ri: personalizim i kundërshtarit, përjashtim mbi bazë identiteti dhe përdorim i gjuhës së frikës për të ngjallur mobilizim elektoral. Në vend të debatit për politikat publike, Trump po ringjall një version të rrezikshëm të luftës së ftohtë ideologjike brenda vetë Amerikës.
Zohran Mamdani, një figurë e majtë progresive që ka ndërtuar karrierën mbi aktivizmin social dhe kundërshtimin ndaj politikave të ICE-së (Agjencisë së Migracionit), e ka cilësuar këtë sulm si “tentativë për të frikësuar demokracinë dhe për të heshtur qytetarët që guxojnë të mendojnë ndryshe”. Për të, ky nuk është thjesht një duel politik, por një provë e thellë për shpirtin demokratik të Shteteve të Bashkuara.
Në thelb, përplasja Trump–Mamdani nuk është thjesht për pushtet vendor, por për vetë identitetin politik të Amerikës: për kufirin mes lirisë dhe kontrollit, mes debatit dhe frikës.
Retorika e Trumpit e kthen çdo kundërshtar në armik ideologjik, çdo qytet në fushëbetejë dhe çdo debat në spektakël. Ajo që ndodh në Nju Jork sot është një paralajmërim për demokracitë e tjera nesër, se autoritarizmi nuk vjen gjithmonë me tanke.../Pamfleti
Lini një Përgjigje