FLASH
Shkruar nga Pamfleti
Vetëm pak ditë pas paraqitjes së tij para zyrës së prokurorit publik të Bosnjës dhe Hercegovinës me akuzat për sulm ndaj rendit kushtetues, Milorad Dodik, Presidenti i Republikës Srpska, është rikthyer me deklarata të hapura separatiste.
Në një tubim në Nevesinje për të përkujtuar kryengritjen serbe kundër Perandorisë Osmane, Dodik shfrytëzoi rastin për të artikuluar qartë ambiciet e Republikës Srpska për t'u shkëputur nga Bosnja dhe për t'u bashkuar me Serbinë, një retorikë e njohur që kërcënon jo vetëm stabilitetin e brendshëm, por edhe paqen në rajon.
Të dielën, Nevesinje përkujtoi 150-vjetorin e kryengritjes serbe në rajon kundër Perandorisë Osmane. Në tubim morën pjesë politikanë kryesorë nga Republika Srpska dhe përfaqësues të Serbisë fqinje.
Dodik nuk e humbi rastin të fliste për shkëputjen e Republikës Serbe. Ai deklaroi se qëllimi historik i popullit serb duhet të jetë bashkimi i Republikës Serbe dhe Serbisë. Ai tha se elita serbe duhet të bashkohet dhe të përcaktojë “qëllimet kombëtare dhe shtetërore”.
“Ne kemi nevojë për unitetin tonë, lidershipin tonë të padiskutueshëm dhe shtete të forta. Ne duam të ndërtojmë platformën tonë me Serbinë, jo me boshnjakët dhe kroatët. Serbët sot kanë dy shtete, Republikën Srpska dhe Serbinë.
Kjo nuk është Bosnjë dhe Hercegovina. Sa më gjatë të qëndrojmë atje, aq më shumë humbasim identitetin tonë. Pse njerëzit nga Sarajeva duan që ne të jetojmë me ta nëse duan të na vjedhin diçka çdo ditë?”, tha Dodik.
Lini një Përgjigje