FLASH
Shkruar nga Pamfleti
Dokumente të qeverisë serbe tregojnë se inteligjenca e Serbisë, në bashkëpunim me FSB-në e Rusisë, ka testuar armë sonike te qentë. Të njohura si Pajisje Akustike me Rreze të Gjatë (LRAD), pajisjet përdoren për komunikim në distancë të gjatë, por mund të shkaktojnë dëmtime të dëgjimit në distancë të afërt. Sipas raportimeve, ato gjithashtu mund të shkaktojnë dhimbje koke, marramendje dhe të përziera.
Në Serbi, dhjetëra mijëra qytetarë protestojnë në rrugë e sheshe, që nga tragjedia e Novi Sad, në nëntor 2024. Në mars 2025, gjatë njërës prej demonstratave më të mëdha, një zhurmë shurdhuese përfshiu papritur rrugën kryesore të Beogradit.
Pamjet e ndryshme të publikuara nga kënde të shumta tregonin zhurmën që përhapet përmes turmës, e ndjekur nga një shpërndarje në panik e turmave.
Protestuesit, që përfunduan në urgjencën e Beogradit, raportuan të përziera, të vjella, dhimbje koke dhe marramendje.
Qeveria serbe ka mohuar se kundër protestuesve janë përdorur bomba zanore. Presidenti Aleksandar Vuçiç i hodhi poshtë akuzat, duke thënë më vonë se “të gjithë ata që janë përgjegjës për trillime dhe gënjeshtra të tilla brutale do të mbahen përgjegjës nga autoritetet”.
Një muaj pas demonstratës, agjencia serbe e inteligjencës, BIA, publikoi një raport të porositur nga Shërbimi Federal i Sigurisë Ruse (FSB). Raporti deklaroi se pajisjet me decibel të lartë “nuk u përdorën gjatë demonstratave” dhe arriti në përfundimin se nuk kishte asnjë “ndikim masiv psikologjik, moral apo fizik tek njerëzit”.
Sipas dokumenteve të siguruara nga Politico, ekspertët e inteligjencës serbe dhe ruse kryen eksperimentet me kafshë si pjesë e një hetimi pas protestës. Dokumentet u përpiluan nga BIA dhe një ministri qeveritare.
Qëllimi ishte të vlerësohej nëse simptomat e përshkruara nga protestuesit ishin në përputhje me efektet e topave me zë, të cilët autoritetet serbe kanë pranuar më parë se ishin në dispozicion të policisë.
Sipas dokumenteve, qentë u zgjodhën si subjekte testimi sepse janë "jashtëzakonisht të ndjeshëm ndaj efekteve akustike". Kafshët u rrezatuan me dy modele LRAD: LRAD 100X MAG-HS dhe LRAD 450XL, nga "distanca prej 200, 150, 100, 50 dhe 25 metrash". Raporti mbi hetimin e inteligjencës serbe dhe ruse arriti në përfundimin se "gjatë rrezatimit të sinjaleve bazë dhe të testimit, objektet biologjike (qentë) nuk përjetuan asnjë shqetësim (ndryshime në sjellje) në distancat e testuara. Qentë u ekzaminuan tre ditë pas testeve dhe nuk treguan ndryshime në gjendjen e tyre".
Dokumentet sugjerojnë gjithashtu se testet mund të jenë kryer pa lejet e nevojshme për eksperimente në kafshë, pa dijeninë e ministrisë përkatëse. Legjislacioni serb kërkon që eksperimentet në kafshë të regjistrohen paraprakisht dhe të miratohen nga organet kompetente, përfshirë një komitet etik, dhe ndalon shprehimisht përdorimin e kafshëve për testimin e armëve dhe pajisjeve ushtarake.
Lini një Përgjigje