FLASH
Shkruar nga Pamfleti
Armen Sarkisyan, themeluesi i batalionit që lufton kundër Ukrainës, humbi jetën pas shpërthimit që vrau gjithashtu edhe truprojën e tij.
Një bombë që shpërtheu në hollin e një blloku apartamentesh luksoze në Moskë, ka lënë të vdekur një udhëheqës paraushtarak pro-rus nga Ukraina lindore së bashku me truprojën e tij.
Bomba shpërtheu pikërisht kur një burrë me truprojë hyri në hollin e kompleksit rezidencial Scarlet Sails në brigjet e lumit Moskë të hënën, raportuan mediat ruse.
Agjencia ruse e lajmeve Tass, duke cituar shërbimet e sigurisë, raportoi se shpërthimi ishte një sulm ndaj Armen Sarkisyan, kreut të federatës së boksit në Donetsk të pushtuar nga Rusia dhe themeluesit të një batalioni që luftonte kundër Ukrainës. Sarkisyan, i cili kërkohet në Ukrainë, ka një histori të gjatë për të ndihmuar forcat pro-ruse në Ukrainë.
Sarkisyan u dërgua në spital në gjendje kritike ku më vonë iu nënshtrua plagëve të marra, ndërsa truproja e tij u vra menjëherë, tha Tass.
Armen Sarkisyan, themeluesi i batalionit ArBat humbi këmbën e majtë dhe më pas humbi jetën pasi u përfshi në një sulm me bombë që sipas raportimeve fillestare la dy të vdekur dhe pesë të plagosur.
I pari që e pranoi lajmin e vdekjes ishte ish-këshilltari i Putinit, Sergei Markov që tha se “Sulmet e Ukrainës po i afrohen gjithnjë e më shumë elitës ruse”.
Pajisja shpërtheu në hollin e ndërtesës elegante në rrugën Avjatsionnaya, në veri-perëndim të Moskës.
Bommba ishte ndoshta e fshehur në një divan në holl dhe më pas e aktivizuar nga distanca teksa Sarkisjan dhe shoqëruesi i tij po dilnin nga ashensori.
I lidhur me familjen e ish-presidentit të arratisur Viktor Yanukovich dhe në krye të “titushki” (provokatorëve) që në vitin 2014 përplaseshin me rebelët e Euromaidanit, për Kievin, Sarkisjan do të ishte një bos i botës së krimit në Republikën Popullore të Donetskut, i njohur me emrin “Gorlovskij”.
Ai ishte kreu i Federatës së Boksit të Rajonit Donetsk, si dhe qendrës së stërvitjes ushtarake Gorlovka.
Në shtator 2022, ai themeloi një njësi të forcave speciale të quajtur ArBat, Batalion Armen: një grup i lëvizshëm i trupave sulmuese nën komandën e mercenarit të atëhershëm të Wagner, Ajk Gasparjan, i njohur me emrin e luftës si Arbek.
Pas tentativës së rebelimit të Wagnerit të udhëhequr nga i ndjeri Yevgeny Prigozhin, ArBat ishte dërguar në ushtri si pjesë e brigadës ndërkombëtare “Pjatnashka” dhe aktualisht ishte i angazhuar në zmbrapsjen e ukrainasve nga rajoni jugor rus i Kurskut.
Nga shpërthimi raportohet se u plagos një nga personat në eskortë: Nënkolonel i Ministrisë së Brendshme, Oleg Kaspirovich, 49 vjeç, me origjinë nga Krimea, i pranishëm në bazën e të dhënave ukrainase “Mitotvorets” që publikon të dhënat e atyre që sipas autorëve, dyshohet se janë të përfshirë në “krime kundër themeleve të sigurisë kombëtare të Ukrainës”.
Lini një Përgjigje