FLASH
Shkruar nga Pamfleti
Provimi dhe pranimet në Shkollën e Magjistraturës çdo vit mbahen “sekret”.
Për këtë event të rëndësishëm nuk flet askush. Procesi i rekrutimit për kandidatët për gjyqtarë e prokurorë që po mbushin radhët e “drejtësisë” së re, pasi u shkallmua e vjetra me vetting, kalon pa bujë.
Çdo vit, pranimet në “magjistraturë” të gjyqtarëve dhe prokurorëve të rinj kalojnë në heshtje, pa bujë, pa kontestime publike, as mediatike.
Ndërkohë që duhet të ishte e kundërta.
Zëvendësuesit e “Gjin Gjonëve”, “Agron Zhukrëve” apo “Adriatik Llallave” duhet të ishin në fokusin e opinionit publik dhe mediatik.
Ashtu si u bë këto vite me ata që u vetuan, apo kur u fokusua puna e vetuesve të tyre, në KPK dhe KPA.
Kush i ka mbushur radhët e drejtësisë së re këto vite, pra, klasat e Shkollës së Magjistraturës që më pas do jenë gjyqtarët dhe prokurorët e Sistemit të Drejtësisë, që zëvendëson të vjetrin?
Nga vijnë?
Çfarë përfaqësojnë?
A janë në lartësinë e pritshmërive publike kandidatët që më pas do emërohen prokurorë e gjyqtarë që do japin drejtësinë e shumëkërkuar?!
Përse nuk komenton askush në gjithë këto vite, a thua se ky është një proces rutinë, sikur po pranohen studentë te “Kristali”?!
Po “tutorët” që vendosin për kuadrot e reja të sistemit të drejtësisë së reformuar kush janë?
Vetë procesi i provimit, korrigjimit, më pas i rivlerësimit (vetting-ut) të kandidatëve a është i ndershëm?
Është e vërtetë që njoftimet në faqen e Shkollës së Magjistraturës janë publike, ashtu si konsultimet publike që bën qeveria në faqen e https://konsultimipublik.gov.al/, për çdo projektligj.
Po në fund, ligjet miratohen ashtu si të gjithë e dimë, si do Qeveria. A ndodh e njëjta gjë me pranimet në Shkollën e Magjistraturës?
Provimi i pranimit për vitin akademik 2024-2025, do nxjerrë 20 gjyqtarë dhe 25 prokurorë, sipas njoftimit të Shkollës së Magjistraturës në faqen e saj- https://www.magjistratura.edu.al/sq/lista-e-konkurrenteve-me-numrat-e-scantronit-per-provimin-e-pranimit-viti-2024-2025. Kandidatë do jenë 442, sipas link-ut të emrave.
Provimi do të organizohet me shkrim në dy faza. Faza e parë zhvillohet nesër datë 22 prill 2024, ora 8.00-13.00 tek Pallati i Kongreseve në Tiranë. Faza e dytë, zhvillohet në datë 24 dhe 25 prill 2024, ora 8.00-13.00 tek “Tirana Olimpik Park” ku ndodhet FSHF., tek Salla e lojrave me dorë “Feti Borova”, në vendin ku zhvillohen aktivitete dhe ndeshje sportive basketbolli apo volejbolli.
Parku Olimpik është nën kujdesin dhe ruajtjen e Agjencisë së Parqeve dhe Rekreacionit, në varësi të Bashkisë Tiranë.
Prapaskena do vëzhgojë me kujdes këtë aktivitet josportiv me rëndësi madhore për të ardhmen e vendit, prapaskenat dhe kulisat e zhvillimit të tij.
Prokurorët dhe gjyqtarët e rinj, emëruar këtyre viteve, nuk janë thjesht juristë që plotësojnë vendet vakante të boshatisura nga vettingu reformues. Ata janë shpresa për ringjalljen e gjithë sistemit juridik dhe politik në Shqipëri.
Ndaj me një seri artikujsh, faktesh dhe emrash do analizohet dhe ekspozohet për herë të parë procesi “i heshtur”, procesi i zëvendësimit të Drejtësisë së vjetër, me të renë.
Salla “Feti Borova” e lojërave me dorë në Tiranë do jetë stacioni i parë.
Lista e plotë e kandidatëve:
Lini një Përgjigje