FLASH
Shkruar nga Pamfleti
Dëbora e parë për këtë sezon ka zbardhur edhe malësitë e Librazhdit, duke sjellë një panoramë të bukur, por edhe probleme për banorët dhe natyrën e zonës.
Sipas të dhënave nga Drejtoria e Zonave të Mbrojtura në Elbasan, reshjet e dendura të dëborës kanë nisur rreth orës 11:00 në Parkun Kombëtar të Shebenikut. Dëbora ka përfshirë gjithashtu edhe fshatin turistik të Fushë-Studentit, një destinacion i njohur për turizëm malor.
Por përveç bukurisë natyrore, dëbora e parakohshme ka shkaktuar edhe shqetësime. Bujqësia është në rrezik pasi banorët e kësaj zone nuk kanë mundur ende të përfundojnë shkuljen e patateve, ndërsa toka tashmë është mbuluar nga bora.
Nga ana tjetër, barinjtë janë zënë të papërgatitur. Bagëtitë ndodhen ende në stane në kullota malore, duke rrezikuar dëmtimin e tyre për shkak të temperaturave të ulëta.
Pyjet dhe ekosistemet lokale po përballen me një stres klimatik, pasi bora e parakohshme prish ciklin natyror të vjeshtës dhe mund të shkaktojë dëmtime në bimësi. Edhe në fshatrat e tjerë malorë të Librazhdit nga mesdita e sotme reshjet e dëborës kanë zbardhur majat e maleve.
Ekspertët thonë se kjo situatë është një pasqyrë e qartë e ndikimeve të ndryshimeve klimatike, të cilat tashmë po ndihen konkretisht edhe në Shqipëri.
Lini një Përgjigje