FLASH
Shkruar nga Pamfleti
Një tjetër incident detar ka ndodhur gjatë natës në Adriatik pa kaluar ende 48 orë nga e para. Një peshkarexhë dhe një velierë e vogël me flamur anglez janë përplasur në det të hapur.
Forcat e rojes bregdetare kanë organizuar një operacion kërkim-shpëtimi.
Mësohet se as peshkatarët dhe as dy shtetasit anglezë që ndodheshin në bordin e velierës “Blue Moon” nuk kanë pësuar dëmtime përveç tronditjes nga përplasja. Paraprakisht deklarohet se ngjarja ka ndodhur rreth 15 milje larg bregut.
Veliera është përplasur në pjesën e bashit me një peshkarexhë që kishte dalë për gjueti në det. Në pritje të ndihmës, peshkarexha “Perëndesha” e ka tërhequr velierën drejt portit të Durrësit ku pritet të qartësohen edhe detajet e këtij aksidenti detar në një hapësirë ujore, ku trafiku nuk është i rënduar.
Brenda më pak se 24 orëve ky është incidenti i dytë detar.
Një ditë më parë si rezultat i përplasjes nga trageti i linjës Durrës-Bari u mbyt anija e peshkimit “Elton I”, ndërsa policia kufitare shpëtoi nga mbytja ekuipazhin e saj, që arriti të përdorë mjetin e shpëtimit që kishin në anije, pak çaste para fundosjes së peshkarexhës.
Tre peshkatarë u shpëtuan në orët e para të mëngjesit pasi kishin mbetur në det të hapur. Peshkatarët ishin Klajdi Kapxhiu, Selim Agasi dhe Muhamed, një shtetas egjiptian.
Ata janë nxjerrë në breg nga forcat e policisë detare dhe janë në gjendje të mirë shëndetësore.
Lini një Përgjigje