FLASH
Shkruar nga Pamfleti
Një ngjarje e rëndë është regjistruar mbrëmjen e së martës në aksin Shkodër-Velipojë. Dy vëllezërit pronarë të një hoteli në plazhin e Velipojës, Edmir dhe Gëzim Frroku vranë me armë zjarri 33-vjeçarin Ersild Ishmi dhe kunatin e tij, Arsid Hoxha, 22 vjeç.
Sipas ekspertit të kriminalistikës, Ervin Karamuço, shkak kryesor i kësaj ngjarje është mosmenaxhimi i masave të sigurisë.
“Shkak kryesor është bërë mosmenaxhimi i masave të sigurisë, ndaj personave me rrezikshmëri të lartë që ka vendosur gjykata dhe mënyra se si institucionet ligjzbatuese kanë garantuar që arresti i shtëpisë mbetet i tillë dhe nuk shkelet. Ne sot arrestin e shtëpisë e kemi formal. E gjitha kjo ngjan shumë e thjeshtë, por që i ka pasur të gjitha mundësitë për t’u parandaluar”, u shpreh Karamuço në “Ora e fundit”.
Ndërsa, eksperti i sigurisë, Fatjon Softa tha se faji është i policisë së shtetit e cila nuk kryen kontrolle.
“Kur ne themi që Policia e Shtetit duhet të kontrollojë territorin, do të thotë që çdo pjesë e territorit shqiptar duhet mbajtur nën kontroll, nën mbikëqyrjen e strukturave policore”, tha Softa.
Lini një Përgjigje