FLASH
Shkruar nga Pamfleti
Zbardhen dokumentet mbi pallatin e prokurorit të SPAK...
Kryebashkiaku Erion Veliaj është përballur sot në gjykatë me prokurorin Ols Dado, i cili firmoi urdhër arrestin. Seanca po vijon e tensionuar, teksa Veliaj ka lëshuar akuza të forta ndaj prokurorit Dado. Veliaj tha se ai është në konflikt interesi pasi ka përfituar leje ndërtimi nga Bashkia e Tiranës.
“Ti je në konflikt interesi, e ke personale me mua. Më je paraqitur dhe ke përfituar leje ndërtimi, ke marrë leje ndërtimi nga ana ime. Pasi ke mbetur i pakënaqur më ke thënë “do ta mbash mend”. Ke dy rrugë, ose të largohesh nga kjo çështje, ose të rreshtohesh me ndërtuesit e tjerë këtu”, ka thënë Veliaj.
Por për çfarë bëhet fjalë konkretisht?
Sipas dokumentit të siguruar nga 'Pamfleti', leja e ndërtimit është firmosur në 9 shtator 2021 ndaj shoqërisë “Alb Edil”, ku janë një numër i madh përfituesish, mes të cilëve figuron edhe Ols Dado. Bëhet fjalë për një pallat deri në 9 kate te “Rruga e Bogdanëve”. Toka ka qenë në pronësi të Dados dhe aty më pas është bërë pallat.
Vetë Veliaj pretendon se prokurori ka mbetur i pakënaqur dhe e ka kërcënuar, por nuk dihen detaje.
Veliaj u arrestua me urdhër të Dados pasi akuzohet për korrupsion dhe pastrim parash. Bashkë me të u ndalua dhe bashkëshortja, e cila është në “arrest shtëpie”. Po ashtu u arrestua biznesmeni Elman Abule, teksa janë duke u hetuar në “detyrim paraqitje” 5 biznesmenë të tjerë.
Arrestimi i tij ka trazuar ujërat politike. PS për herë të parë ka ngritur krye kundër drejtësisë, ndërkohë që PD ka filluar të ndryshojë kurs. /Pamfleti
Lini një Përgjigje