FLASH
Shkruar nga Pamfleti
Gjykata e Posaçme vendosi dje masat e sigurisë për tetë ish-drejtorët dhe funksionarët e Bashkisë së Tiranës, të hetuar për korrupsion dhe shkelje të barazisë në tendera. Gjykata la në burg tre ish-drejtorët dhe për pesë punonjës vendosi detyrim paraqitje.
Hetimi ndaj tyre nisi kryesisht nga SPAK, dhe më pas u bashkua me kallëzimin që kreu Belind Këlliçi në maj të vitit të kaluar për shkelje të barazisë në tendera.
Hetimi zbuloi se ish-drejtorët, i Ujësjellësit, Redi Molla, i IKMT-së Mariglen Qato dhe Taulant Tusha që ndodhej në burg me masë të dytë sigurie kishin favorizuar në së paku 11 procedura tenderimi kompaninë “5D Construction”, e cila rezulton dhe me dy emra të tjerë.
Sipas SPAK, kjo kompani është e regjistruar në emra të tjerë, lidhje miqësore dhe shoqërore e të dyshuarve por që në të vërtetë pronarë të saj janë Qato dhe Molla. Mes emrave që drejtonin kompaninë por fiktivisht është biznesmeni Nestor Muhametllari, që ndodhet në detyrim paraqitje. SPAK dhe BKH zbarkoi në shtëpinë e tij duke gjetur prova.
Mes materialeve që i janë sekuestruar është edhe një bllok ku mbante shënime mbi tërheqjet bankare, të gjitha pagesat duke iu referuar personave të shkruar me emrin (R) dhe me emrin (M).
Gjithashtu sipas dosjes janë përfituar të dhëna nga këqyrja e dokumenteve të sekuestruara në ambientet e shoqërisë “5D Konstruksion” si dhe nëpërmjet akteve të ekspertimit teknik kompjuterik.
Po kush është Nestor Muhametllari?
Biznesmeni doli në skenë në mars të vitit 2021, teksa Muhamet Petriti i shiti kompaninë “Vas Konstruksion” pikërisht te ai për shifrën e 1 milionë lekë të reja ose afro 9 mijë euro. Nëntë muaj më vonë, kësaj kompanie i ndryshohet emri në “5D Konstruksion”.
Bilanci i kompanisë zbulonte se tre muaj para shitjes, pra në fund të vitit 2020, ajo kishte 60 milionë lekë ose 540 mijë euro në banka. Paralelisht “5D Kontruksion” nuk kishte asnjë borxh dhe kësisoj llogaritë e arkëtueshme ishin dukshëm më të larta se ato të pagueshme. Dhe në këtë mënyrë, i përfitoi blerësi Muhametllari me vetëm 9 mijë euro.
E thënë ndryshe kjo kompani me vlerë miliona eurosh, u shit për vetëm 9 mijë euro. Katër muaj pas blerjes së kompanisë, Muhametllari i shpërndau vetes si pronar 358 mijë euro divident nga fitimet e marra në vitin e mëparshëm.
Pikërisht te shitja e kompanisë shfaqet një veprim i çuditshëm pa logjikë financiare duke lindur dyshimi i arsyeshëm për organet hetuese.
Por çudia nuk përfundon ketu. Kjo kompani përpara se të shitej ishte veç të tjerash subjekt ndërtues në një leje ndertimi miratuar me firmën e Erion Velisë, shefit të Mariglen Qatos, në 2 shkurt 2021 për nje godinë 8-9 katëshe me dy të tjerë parkim nëntokësor.
Më pas, kjo kompani me pronar Nestorin, ka fituar dhe 2 leje ndertimi te tjera (si investitor dhe ndërtues), njëra përball KLAN-it aty ku dhe ka patur shtëpinë Mariglen Qato.
Ndërkaq, në një hulumtim të shpejtë në “Open Corporates” rezulton se biznesmeni Nestor Muhametllari ka përfituar plot 88 486 994,20 lekë përmes 5 kontratave publike nga qeverisja vendore. Sot është nën akuzë nga SPAK për akuzën e Korrupsionit Aktiv ndaj Personave që ushtrojnë Funksione Publike.
Lini një Përgjigje