FLASH
Shkruar nga Pamfleti
Kanë kaluar plot 27 vite nga viti i mbrapshtë ‘97, por Tepelena nuk e ka harruar veprimin e guximshëm të pilotëve të aviacionit ushtarak shqiptar, për të mos respektuar urdhrin e bombardimit mbi zonat e banuara.
Bashkia Tepelenë ka nderuar sot me titull nderi ish-pilotin Fatmir Meçaj me motivacion “shmangien e vëllavrasjes në vitin 1997”. Ai dhe kolegët e tij të asaj periudhe tregojnë se respektimi i atij urdhri ishte në shkelje të betimit të ushtarakut.
Fatmir Meçaj tregon se u urdhëruan të bombardojnë nga ajri depot e armatimit në fshatin Turan të Tepelenës ndërsa zona ishte e populluar dhe brenda depove kishte shumë njerëz të irrituar që po merrnin armë.
“Pasi u dha urdhri të gjithë ishin të emocionuar dhe njëkohësisht mendonin, ç’është ky urdhër në kundërshtim me interesat e popullit. Lufton e mira me të keqen e në këtë rast fitoi e mira sepse ne ishim të detyruar të zbatonim betimin që kishim bërë dhe urdhri ishte në kundërshtim me betimin prandaj vendosëm të mos veprojmë.
Edhe shokët e mi që u ngritën pas meje të njëjtën gjë bënë. Ne na u dha urdhër që të qëllonim në Turan, mbi depot e Turanit, mbi njerëzit që ishin atje duke marrë armatim. Kur pashë që kishte njerëz u ktheva në bazë. Kolegut tim Agim Matraku që u ngrit pas meje i thashë: pashë, por nuk pashë gjë, pra nuk duhet të veprosh. Edhe ai të njëjtën gjë bëri”, tregon ish-piloti.
Lini një Përgjigje