FLASH
Shkruar nga Pamfleti
Paraqitja në SPAK vjen pas kontrolleve në banesë nga agjentët e Byrosë Kombëtare të Hetimit, pasi dyshohet për lidhje me bandën e Suel Çelës.
Drejtori i Ujësjellësit të Elbasanit, Luan Tabaku është paraqitur ditën e sotme në SPAK.
Vizita në SPAK vjen disa ditë pas aksionit të SPAK, në qytetin e Elbasanit, nga oficerët e BKH-së dhe efektivët e Policisë së Shtetit në Shqipëri, ku u ushtrua kontroll në disa banesa dhe biznese në lidhje me dosjet e hapura për Suel Çelën.
Kontrollet u ushtruan në zyrat e biznesit të Nazif Bajramit, pronar i kompanisë “Bajrami N” dhe biznesmen i njohur në fushën e ndërtimit në Elbasan, i cili ka fituar një sërë tenderësh nga institucionet publike.
Po ashtu, kontrolle janë ushtruar edhe tek Marenglen Çoku, administrator i ekipit të Futbollit të A. F. Elbasani, i cili është dhe pronar i kompanisë “ÇOKU M & E”.
Oficerët e BKH-së kanë ushtruar kontrolle dhe në banesën e drejtorit të Ujësjellës Kanalizimeve Elbasan (UKE), Luan Tabaku.
Mësohet se nga zbërthimi i bisedave në aplikacionin e enkriptuar “Sky Ecc”, ata kanë rezultuar të lidhur me grupin kriminal të drejtuar nga Suel Çela, ku ky i fundit vijon të jetë ende në kërkim nga SPAK-u.
Burime bëjnë me dije se Prokuroria e Posaçme po heton tenderë publikë të cilët dyshohet se janë përfituar nga krimi i organizuar përmes personave të tretë.
Në nëntor të vitit të kaluar, SPAK goditi bandën e Suel Çelës, duke lëshuar 21 masa sigurie në total, por kreu i saj, arriti t’i shpëtonte sërish vënies përpara ligjit, pasi nuk u arrit të arrestohej.
Banda e drejtuar prej tij akuzohet për një sërë ngjarjesh kriminale në Elbasan, si dhe për trafik të lëndëve narkotike nga vendet e Amerikës Latine drejt Europës./ Pamfleti
Lini një Përgjigje