FLASH
Shkruar nga Pamfleti
Këngëtari i njohur spanjoll Julio Iglesias është përfshirë në një skandal të rëndë, pasi dy ish-punonjëse femra e kanë akuzuar për sulm seksual, ngacmim të vazhdueshëm dhe sjellje poshtëruese gjatë kohës që punonin për të.
Sipas një hetimi të përbashkët trevjeçar nga elDiario.es dhe Univision Noticias, dy gratë: një punonjëse shtëpie dhe një terapiste fizike, pretendojnë se abuzimet kanë ndodhur në vitin 2021, në rezidencat e Iglesias në Republikën Domenikane dhe Bahamas.
Hetimi përfshin dëshmi nga 15 ish-punonjës, të cilët kanë punuar për këngëtarin 82-vjeçar nga fundi i viteve ’90 deri në vitin 2023. Sipas mediave, rrëfimet e dy grave kanë qenë të qëndrueshme dhe mbështeten nga prova dokumentare, përfshirë mesazhe, fotografi, raporte mjekësore dhe regjistra telefonatash.
Njëra prej grave, e identifikuar me pseudonimin Rebecca, deklaron se Iglesias e thërriste shpesh në dhomën e tij dhe e prekte seksualisht pa pëlqimin e saj.
“Ai më përdorte pothuajse çdo natë. Ndihesha si një objekt, si një skllave,” ka thënë ajo për mediat.
Ndërkohë, gruaja tjetër, e quajtur Laura, ka deklaruar se këngëtari e ka puthur dhe i ka prekur gjoksin pa leje, si në plazh ashtu edhe në vilën e tij luksoze në Punta Cana.
Rebecca dhe Laura thanë se Iglesias u bëri pyetje intime menjëherë pasi mbërritën, si: “A të pëlqejnë gratë?”, “A të pëlqejnë treshet?”, dhe “A ke bërë operacion gjoksi?”. Ato thonë se ai u kërkoi të shihte gjoksin e tyre në disa raste dhe gjithashtu i preku.
Të dyja gratë flasin për një ambient frike, kontrolli dhe abuzimi të normalizuar, ndërsa hetimi zbulon edhe një proces rekrutimi të dyshimtë, ku kandidatëve u kërkoheshin fotografi të fytyrës dhe trupit të plotë.
Sipas raportimit të elDiario.es, dy gratë kanë depozituar tashmë një kallëzim zyrtar në Audiencia Nacional, gjykata më e lartë penale e Spanjës, duke e akuzuar Iglesiasin për sulm seksual dhe trafikim njerëzor.
Julio Iglesias dhe avokati i tij nuk kanë reaguar ndaj kërkesave të mediave për koment. Megjithatë, një ish-mbikëqyrëse e përmendur në dëshmi i ka mohuar akuzat, duke e cilësuar këngëtarin si “një zotëri të madh dhe shumë respektues ndaj grave”.
Në mbrojtje të tij ka reaguar edhe Isabel Díaz Ayuso, presidentja e rajonit të Madridit, e cila ka kritikuar ashpër publikimin e akuzave.
Çështja pritet të sjellë zhvillime të tjera të rëndësishme në ditët në vijim.
Lini një Përgjigje