FLASH
Shkruar nga Pamfleti
Franca, Britania dhe Berlini humbin qindra klube, ndërsa gjenerata Z zgjedh mbledhjet private, rrjetet sociale dhe argëtimin pa alkool
Në dekadën e fundit, industria e klubeve të natës në SHBA dhe Europë është tkurrur me shpejtësi, duke krijuar një kontrast të fortë me skenën e viteve të kaluar kur klubet përbënin qendra të gjalla të kulturës urbane. Rënia nuk është rezultat i një faktori të vetëm, por një kombinim i krizës ekonomike, rritjes së taksave, rregulloreve urbanistike gjithnjë e më të ashpra, ndryshimit të zakoneve të brezit të ri dhe pasojave të pandemisë COVID-19 që ndryshoi përfundimisht mënyrën se si njerëzit shpenzojnë kohën e tyre të lirë.
Në Francë, rënia është dramatike. Në vitet 1980 numëroheshin rreth 6,000 klube të natës, ndërsa sot kanë mbetur vetëm 1,400. Kjo do të thotë se shteti ka humbur 70 për qind të klubeve brenda katër dekadave. Analiza e Le Parisien dhe The Times tregon se të rinjtë francezë preferojnë qëndrimin në shtëpi, duke kaluar orë të tëra në video-lojëra, rrjete sociale ose mbledhje të vogla me miqtë, ndërsa daljet në klube janë kthyer në përjashtim dhe jo në rregull. Shumë pronarë raportojnë se testet e alkoolit në rrugë, tarifat e larta për artistët dhe kostot e energjisë kanë shkatërruar modelin ekonomik të natës.
Në Britani, tabloja është po aq e zymtë. Midis vitit 2013 dhe 2024, numri i klubeve është përgjysmuar, duke rënë nga 1,700 në vetëm 787. Pandemia shënoi pikën e kthesës, sepse gjatë saj u mbyllën 30 për qind e klubeve dhe shumë nuk u hapën më kurrë. Krahasuar me lokalet e tjera të licencuara, ku rënia ishte vetëm 13 për qind, klubet u goditën dyfish më rëndë. Organizata Night Time Industries Association ka paralajmëruar se, nëse ky ritëm vazhdon, deri në vitin 2030 Britania mund të mos ketë më klube nate në kuptimin klasik të fjalës.
Berlini, që prej viteve ’90 është konsideruar kryeqyteti botëror i muzikës techno, po përjeton po ashtu një krizë serioze. Qyteti numëron mbi 150 klube, por gati gjysma e tyre kanë deklaruar se ndodhen në prag mbylljeje gjatë vitit 2025. Shembujt përfshijnë lokalet Watergate dhe Renate që i dhanë fund aktivitetit. Arsyeja kryesore lidhet me rritjen e qirave, numrin në rënie të turistëve dhe mungesën e mbështetjes shtetërore. Edhe pse qeveria gjermane i ka njohur klubet si institucione kulturore për t’i mbrojtur nga zhdukja, realiteti financiar mbetet i pamëshirshëm.
Në një plan më të gjerë, ndryshimi nuk është vetëm europian, por global. Financial Times ka analizuar të dhënat e platformës Resident Advisor dhe ka vënë re se eventet që zgjasin pas orës tre të mëngjesit janë pakësuar ndjeshëm në 12 nga 15 qytetet kryesore të botës gjatë dhjetë viteve të fundit. Organizatorët po orientohen drejt eventeve ditore që fillojnë herët dhe mbyllen para mesnatës, sepse brezat e rinj preferojnë kontroll më të madh mbi kohën e tyre, konsum më të kufizuar të alkoolit dhe një lloj argëtimi që nuk rrezikon shëndetin.
Shkaqet e rënies janë të shumta dhe të ndërthurura. Kriza ekonomike ka rritur kostot e operimit, duke bërë që profitabiliteti mesatar i klubeve në Gjermani të zbresë në vetëm 4.2 për qind, shumë më poshtë se mesatarja kombëtare prej 7.5 për qind. Pa subvencione, ky nivel bie në 1.2 për qind, duke e bërë aktivitetin pothuajse të pamundur. Regulloret urbanistike për zhurmën dhe sigurinë, bashkë me presionin e gentrifikimit, kanë shtuar barrën mbi pronarët. Pandemia COVID-19 shënoi një tjetër plagë të thellë, duke mbyllur industrinë për muaj të tërë dhe duke detyruar konsumatorët të orientohen drejt argëtimit virtual ose alternativave private. Ndërkohë, ndryshimi kulturor i brezit Z ka ulur konsumin e alkoolit dhe e ka zhvendosur interesin drejt festivaleve të mëdha verore, platformave digjitale dhe formave të reja të ndërveprimit shoqëror.
Lini një Përgjigje