FLASH
Shkruar nga Pamfleti
Kryeministri i Kosovës, Albin Kurti, i ka dërguar një letër presidentit ukrainas, Volodymyr Zelensky në kuadër të një vjetorit të rezistencës së Ukrainës nga agresioni rus. Kurti i shkruan se edhe pse jemi dy popuj gjeografikisht larg, historikisht janë të ngjashme. Më tej ai është shprehur se Kosova dhe Ukraina janë dy popuj që kemi humbur shumë nga qytetarët për shkak të planeve imperialiste dhe tokë grabitëse të shteteve fqinje.
“Ne jemi dy popuj që kanë humbur shumë nga qytetarët tanë më të mirë për shkak të planeve imperialiste dhe tokëgrabitëse të shteteve fqinje. Edhe pse jemi gjeografikisht të largët, me popuj me madhësi shumë të ndryshme, historitë tona përkatëse të shekullit të shkuar dhe të sotmit, kanë një ngjashmëri të dukshme. Në këtë ngjashmëri historike rrugët tona kryqëzohen.” – ka shkruar Kurti.
Kreu i qeverisë së Kosovës tregoi sesi përpara 23 viteve SHBA dhe fuqitë Perëndimore demokratike u bënë bashkë për të ndalur gjenocidin serb në popullin e Kosovës, shtet i cili aktualisht nuk e ka sanksionuar Rusinë për aktet në Ukrainë.
Ndër të tjera ai siguroi Zelenskyn se NATO do i vijë në ndihmë Ukrainës, ashtu siç dikur i erdhi Kosovës.
“Para 23 vitesh ne bëmë rezistencën tonë dhe NATO na ndihmoi për të mbyllur ciklin gjenocidal të Serbisë. 19 shtete demokratike u bënë bashkë për të ndalur gjenocidin e Serbisë kundër popullit tonë. Tani ju jeni në frontin e një lufte të re që duhet t’i japë fund gjenocidit të Rusisë kundër popullit tuaj, si dhe t’u japë fund përpjekjeve të saj imperialiste për të marrë territorin tuaj. Dhe përsëri demokracitë, shtete anëtare të NATO-s, po ju mbështetin ju, ashtu siç na mbështetën ne.” – ka shkruar Kurti.
Kryeministri i Kosovës ka shkruar se Serbia ende mban një dëshirë të mbuluar hollë për të minuar sovranitetin e Kosovës dhe për të marrë shtëpitë tona.
“Këto vlera janë po ashtu në rrezik në rajonin tonë: Aleati kryesor i Rusisë në Ballkan, fqinja jonë veri-verilindore Serbia, mban ende një dëshirë të mbuluar hollë për të minuar sovranitetin tonë dhe për të marrë shtëpitë tona. Prandaj, në një kuptim shumë real, qëllimi juaj është qëllimi ynë; beteja juaj është beteja jonë.” - ishin fjalët e kryeministrit.
Lini një Përgjigje