FLASH
Shkruar nga Pamfleti
Ka nisur në Gjykatën e Posaçme Kundër Korrupsionit dhe Krimit të Organizuar (GJKKO) seanca paraprake ndaj kryebashkiakut të Kolonjës, Erion Isai, dhe 14 të pandehurve të tjerë, mes tyre ish-zyrtarë dhe punonjës të Bashkisë Kolonjë dhe Autoritetit Rrugor Shqiptar (ARRSH).
Ata akuzohen për veprat penale të shkeljes së barazisë në tendera dhe shpërdorimit të detyrës, në lidhje me një hetim të Prokurorisë së Posaçme për tre procedura prokurimi të zhvilluara gjatë vitit 2020, me një vlerë totale mbi 30 milionë euro.
Në këtë fazë të procesit, GJKKO pritet të shqyrtojë kërkesën e SPAK për kalimin e çështjes në gjykim. Gjykata mund të vendosë pranimin e kërkesës dhe nisjen e procesit gjyqësor, kthimin e dosjes për plotësim hetimesh ose pushimin e çështjes.
Në listën e të pandehurve bëjnë pjesë:
Erion Isai – kryetar i Bashkisë Kolonjë;
Eljona Mydini – ish-zëvendëskryetare e Bashkisë Kolonjë;
Erjon Cenko – punonjës i Bashkisë Kolonjë;
Engjëll Dine – punonjës i Bashkisë Kolonjë;
Ermal Zylfo – punonjës i Bashkisë Kolonjë;
Armand Tafil – punonjës i Bashkisë Kolonjë;
Muharrem Tartari – punonjës i Bashkisë Kolonjë;
Shpëtim Liço – punonjës i Bashkisë Kolonjë;
Ergys Verdho – ish-drejtor i Përgjithshëm i ARRSH-së;
Erald Elezi – ish-drejtor në ARRSH;
Genti Raça – përgjegjës i preventivit në ARRSH;
Donikë Shehu – ish-specialiste në ARRSH;
Klarita Konomi – ish-specialiste në ARRSH;
Nikollaq Mihali – specialist në ARRSH;
Erdit Salillari – përgjegjës sektori në ARRSH.
Sipas SPAK, tre procedurat e prokurimit të vitit 2020 janë nën hetim për dyshime mbi shkeljen e rregullave të tenderimit dhe favorizim të mundshëm gjatë zhvillimit të tyre.
Vendimi i GJKKO-së në seancën paraprake do të përcaktojë nëse dosja do të kalojë për gjykim në themel, do të kthehet për veprime të mëtejshme hetimore apo do të pushohet në këtë fazë të procedimit.
Lini një Përgjigje