FLASH
Shkruar nga Pamfleti
Moska ka mohuar akuzat se fshihet pas videos së rreme për zgjedhjet amerikane, pasi inteligjenca amerikane hodhi akuza se Rusia qëndron mbrapa një videoje të tillë, në të cilën shfaqet një imigrant prej Haitit, duke thënë se ka votuar disa herë.
Tri agjenci amerikane të inteligjencës thanë të premten se “aktorë të ndikimit rus”, kanë krijuar një video, në kuadër të “përpjekjeve të gjera të Moskës për të krijuar pikëpyetje për integritetin e zgjedhjeve amerikane”.
Në deklaratën e këtyre agjencive është thënë se aktorët rusë qëndrojnë mbrapa videos së rreme.
“E kemi vërejtur deklaratën e shërbimeve amerikane të inteligjencës, me akuza për vendin tonë për krijim të videove të fabrikuara për shkeljet zgjedhore në Shtetet e Bashkuara. I shohim si të pabazuara këto akuza”, tha Ambasada ruse në Shtetet e Bashkuara, përmes një postimi në Telegram.
Në videon 20-sekondësh shihet një burrë me një të folur robotike duke thënë se “ne jemi prej Haitit. Kemi ardhur në Amerikë gjashtë muaj më parë, ne tashmë kemi shtetësi amerikane dhe jemi duke votuar për Kamala Harrisin”.
Sekretari i shtetit të Xhorxhias, Brad Raffensperger, zyrtar i lartë në këtë shtet të luhatshëm për preferencën zgjedhore, deklaroi dje se kjo video është shembull i “dezinformës me shënjestër”.
Raffensperger u shpreh se kjo video “qartësisht e rreme”, me shumë mundësi është prodhuar prej “fabrikës ruse të lajmeve të rreme”.
Ambaada ruse, tha se Rusia nuk ka siguruar asnjë dëshmi për t’i bazuar pretendimet e zyrtarëve amerikanë.
Zgjedhjet presidenciale në Shtetet e Bashkuara do të mbahen më 5 nëntor. Nënpresidentja amerikane, Kamala Harris, është kandidate e demokratëve për presidente, ndërsa ish-presidenti amerikan, Donald Trump, është kandidat i republikanëve.
Gara mes tyre thuhet se do të jetë e ngushtë.
Lini një Përgjigje