FLASH
Shkruar nga Pamfleti
Tre orë ka zgjatur takimi mes Kryeministres italiane Giorgia Meloni dhe Presidentit francez Emmanuel Macron, i cili ishte në Itali për vizitë zyrtare.
Takimi 3-orësh u pasua nga një darkë pune.
Sipas shtypit italian, Meloni-Macron ranë dakord për të forcuar Europën.
“Italia dhe Franca, synojnë të forcojnë angazhimin e tyre të përbashkët për një Europë më sovrane, më të fortë dhe më të begatë, veçanërisht të orientuar drejt paqes dhe e aftë të mbrojë interesat e veta dhe të mbrojë qytetarët e saj”, thuhet në deklaratën e përbashkët zyrtare pas takimit Meloni-Macron.
Sipas të njëjtës deklaratë, takimi Meloni-Macron tregoi përputhshmërinë sa i përket axhendës europiane, për investimet publike, energjinë, konkurrueshmërinë e bizneseve europiane, forcimin e lidhjeve transatlantike dhe luftën kundër emigracionit të paligjshëm.
“Kjo vlen edhe për sektorët në tranzicion, si industria automobilistike dhe ajo e çelikut, të cilat kërkojnë një angazhim të fortë europian, si dhe për sektorët më të avancuar, si inteligjenca artificiale, burimet e energjisë së dekarbonizuar e të rinovueshme si energjia bërthamore”.
Në takimin mes dy liderëve u diskutua edhe për situatën në Lindjen e Mesme dhe luftën në Ukrainë, për të cilën palët ukrainase dhe ruse janë në negociata për armëpushim.
Takimi Meloni-Macron vjen pas mosmarrëveshjeve të fundit mes dy liderëve në Tiranë.
Pasi përfundoi vizitën, Presidenti Macron u kthye në Francë.
Lini një Përgjigje