FLASH
Shkruar nga Pamfleti
Gazetarja Klodiana Lala ka folur lidhur me vrasjen e Klaudio Prendit, djali i ish-gjyqtarit Fran Prendi.
Lala ka zbuluar detaje duke thënë se autorët pritën viktimën për rreth 1 orë, në një distancë 200-300 metra, ndërsa e kanë qëlluar me 7 plumba, 3 prej të cilëve i kanë marrë jetën.
Klodiana Lala tha se vrasja e Klaudio Prendit ka qenë e organizuar. Ajo u shpreh se automjeti i përdorur nga autorët e dyshuar ishte vjedhur 1 vit më parë në Tiranë, targat ishin vjedhur në Greqi dhe kanë ardhur në mënyrë të paligjshme në Shqipëri, është pritur 1 orë që të dalë nga lokali, pra të mos kishte gabim në shënjestër.
Lala theksoi se autorët kanë studiuar gjithçka, madje edhe rrugën nga ku kanë kaluar pas krimit.
Gazetarja theksoi se ata kanë kaluar në Shkozë dhe makinën e kanë djegur në Farkë, ku nuk kishte asnjë kamer sigurie. Sipas saj, atje i prisnin edhe dy automjete të tjera. Lala tha se mendohet se në vrasje ishin 3 persona dhe i kanë pritur 3 ose 4 të tjerë, pra kemi një grup të strukturuar kriminal.
“Klaudio Prendi dy orë para se të vritej, ishte duke pirë kafe me 3 punonjës policie, në një lokal që është 24-orësh. Detaji më i ri është që autorët e ngjarjes e kanë pritur 1 orë, pra automjeti i tyre ka qëndruar 200-300 metra larg automjetit të parkuar të Klaudio Prendit. Ata e kanë pritur derisa ai ka dalë nga kafja, ka kaluar rrugën, ndërsa më pas ka hipur në makinën e tij.
Në ato momente autorët e dyshuar janë afruar nga krahu i kundërt dhe e kanë qëlluar me 7 plumba, 3 prej të cilave i kanë shkaktuar vdekjen.
Punonjësit e policisë kanë qenë jashtë detyre, megjithatë njëri prej tyre është vënë në ndjekje të autorëve, ndërsa dy të tjerët kanë tentuar t’i japin ndihmën e shpejtë, edhe pse nuk ia kanë dalë, pasi Klaudio arriti në spital pa shenja jete”, tha gazetarja për “News 24”.
Në vijim, Lala sqaroi se vrasja po hetohet në disa pista. Sipas saj, një nga pistat është ajo që ka të bëjë me dyshimet për përfshirjen e tij në lojërat e fatit.
“Janë të paktën 3 raste të borxheve që nuk i njihnin në mënyrë të ndërsjelltë, me disa personazhe të tjerë që ai ka pasur konflikte dhe ai ka vajtur rreth 10 ditë më përpara në komisariat për një përleshje që ka pasur, ose rrahje”, tha Lala.
Gazetarja u shpreh se pista e dytë ku po hetohet ka të bëjë me një aktivitet që Klaudio Prendi ka pasur jashtë vendit për shkak të disa lëvizjeve të shpeshta të tij në Dubai dhe disa vende të BE.
Dhe pista e 3-të, sipas gazetares Lala, është ajo që ka të bëjë me funksionin që ka ushtruar babai i tij për një kohë shumë të gjatë si gjyqtar i Krimeve të Rënda nga 2006 deri në 2020, kur u largua me dorëheqje nga sistemi.
Klodiana Lala deklaroi se babai i Klaudios, si gjyqtar ka dhënë vendime që kanë pasur impakt në opinionin publik sikundër është rasti i Emiljano Shullazit dhe grupit të tij, rasti i Salvadore Leticia, apo edhe rasti i Toyota Auris.
Lini një Përgjigje